«Бир кунда тугатаман» деган Трамп нега ожиз қолди?
«Трампнинг Путинга қарши қўлида ҳеч нарса йўқ».
«Украинадаги урушни бир кунда тугатаман» деб ваъда берган АҚШ президенти Доналд Трамп ҳозирча бу вазифани уддалай олмаяпти. Трамп ўз лавозимига киришганидан буён 55 кун ўтган бўлса-да, ҳатто вақтинчалик тинчлик келишувига ҳам эришилмади, деб ёзмоқда Bild.
Кёлн университети сиёсатшуноси Томас Егер фикрига кўра, Трамп ютқазиб қўйган ҳолатга тушиб қолди. «Трамп музокараларда ўз имкониятларини бутунлай бой берди. У ўз таҳдидлари фақат ярим самарали бўлишини кутмаган эди. Украина ён берди – бу осон бўлди, чунки Трампнинг қўлида босим ўтказиш воситалари бор эди. Аммо (Россия Федерацияси президенти Владимир) Путинга қарши унинг қўлида ҳеч вақо йўқ,» – деди у немис нашрига берган суҳбатида.
Бундан олдин Трамп интервьюларидан бирида ўзининг дабдабали ваъдасини «кинояли» ибора сифатида тушунтиришга уринган эди.
«У киноя сўзининг маъносини тушунишига ишончим комил эмас. Эҳтимол, у шунчаки тарафдорлари буни ҳазил сифатида қабул қилишларига умид қилаётгандир,» дея мулоҳаза қилади Егер.
Сиёсатшунос фикрича, РФ президенти чўзилиб кетган музокаралардан Ғарбни бўлиб ташлаш учун фойдаланмоқда. «Америкаликлар тез натижа хоҳлашади, европаликлар эса ишончли натижа кутишмоқда. Трамп эса бундан кейин қандай йўл тутишни билмай қолган,» дея қўшимча қилди Егер.
