НАТО генерали: Украина Қуролли Кучлари Белгородда илгариламоқда
Украина Қуролли Кучлари Россиянинг Курск вилоятининг катта қисмини назорат қилишни давом эттирмоқда, шунингдек, қўшни Белгород вилоятига кириб бормоқда ва Россия ҳудудидаги ўз мавқеини кенгайтирмоқда. Бу ҳақда НАТОнинг Европадаги Бирлашган қуролли кучлари бош қўмондони, АҚШ армияси генерали Кристофер Каволи 3 апрель куни Конгрессдаги тингловда маълум қилди, дея хабар бермоқда Politico нашри.
«Ҳозирги вақтда Украинанинг сезиларли кучлари Россиянинг Курск вилоятининг анча катта – қисқарган бўлса-да, ҳамон муҳим – қисмини эгаллаб турибди. Бундан ташқари, улар жанубда, Белгород вилоятида стратегик жиҳатдан қулай мудофаа чизиқларини эгаллаган. Тахминан икки ҳафта олдин украиналикларнинг Россиянинг Белгород вилоятида чекланган қарши ҳужуми бошланди. Шундай қилиб, бу минтақада томонларнинг навбатма-навбат муваффақиятлари билан кечаётган кескин қарши туриш давом этмоқда,» – деди генерал.
Нашр маълумотларига кўра, Каволи Украина қўшинларининг Белгород вилоятига киргани ҳақидаги фактни расман тасдиқлаган биринчи ҳарбий раҳбарият вакили бўлди.
Генерал фронтдаги умумий вазиятни шарҳлаш чоғида, Украина қўшинлари ҳозирда мустаҳкам мудофаа позицияларини эгаллаб тургани ва уларни янада кучайтириш учун янги жангчиларни сафарбар қилиш ҳамда тайёрлашда ҳар ҳафта сезиларли натижаларни кўрсатаётганини алоҳида таъкидлади.
