Умра хизматларини лицензиясиз реклама қилган 7 та турфирма жаримага тортилди
Рақобатни ривожлантириш ва истеъмолчилар ҳуқуқларини ҳимоя қилиш қўмитаси Умра хизматларини рухсатсиз реклама қилиш билан боғлиқ янги қоидабузарлик ҳолатларини аниқлади. Бу ҳақда идора матбуот хизмати хабар бермоқда.
Назорат қилувчи органнинг Тошкент шаҳри, Тошкент, Наманган, Фарғона, Навоий, Хоразм вилоятлари бошқармалари томонидан тегишли лицензиясиз зиёрат ташкил этишни таклиф этаётган 7 та туристик фирма аниқланган. Улар — Emir Voyage, Makan United Travel Group, Ezofayz, Murabbiy Travel, Zaytun Tourism, Smrt Systems Company, Nazir Travel N1.
Қонун талаблари бузилиши аломатлари билан ишлар қўзғатилиб, уларга нисбатан ишни кўриб чиқиш якунлари юзасидан молиявий жарималар қўлланди.
Шунингдек, қўмитанинг Наманган ва Фарғона вилоятлари ҳудудий бошқармалари томонидан жами 5 та туроператор мансабдор шахслари ҳамда Telegram каналлар админлари юқоридаги каби қонунчилик талаблари бузилиши юзасидан маъмурий жавобгарликка тортилди, дейилади хабарда.
Шу билан бирга, лицензияга эга бўлмасдан реклама материаллари тарқатаётган 12 дан ортиқ ахборот ресурсини юритувчи шахсларга аниқлик киритиш мақсадида Киберхавфсизлик марказига мурожаат қилинди.
Фуқаролардан Умра зиёратини ташкил этишда фақат лицензияга эга туроператорларга мурожаат қилиш сўралди. Агар нотўғри, ишончсиз ёки шубҳали реклама аниқланса, қўмитанинг 1159 ишонч телефонига қўнғироқ қилиш тавсия этилди.
