Измирнинг тарих ва табиат қўйнидаги дурдонаси: Урла
Измирнинг сокин қирғоқ бўйидаги Урла шаҳри гўзал зайтунзорлар, мевали боғ ва узумзорлар билан ўралган бамисоли ер юзидаги “жаннат”дир. Бу сокин ҳудуд тўрт фаслда ҳам ўзига хос ёқимли тажрибаларни тақдим этади. Бироқ, тош кўчалар ва дафна деразали тош уйларни сайр қилиш, нафис бутик меҳмонхоналарда қолиш, унинг гўзал узумзорларини кезиш ва ноён ўзига хос ўсимлик артишокини татиб кўриш учун май ойи мукаммал мавсумдир.
Соҳил гўзаллиги
Урла шаҳар марказидан бир соатдан камроқ масофада жойлашган бўлиб, юқори сифатли турмуш тарзи ва тинч Эгей руҳи билан Измирдаги мафтункор шаҳарчадир. Чешме ярим оролидаги бу ажойиб жойда ўзига хос жозиба, самимий ва илиқ муҳит ҳукмрондир. Урлада бепоён денгиз манзарали кўплаб бутик меҳмонхоналар мавжуд бўлиб, уларда шаҳар муҳити билан уйғун ҳаёт тарзини кўриш мумкин. Атрофда табиий маҳаллий ва органик маҳсулотларга бой Малгажа бозори, қулай кафелар, ноодатий тарихий уйлар тизилган Урла Арт кўчаси қад ростлаган. Урла, шунингдек, 40 километрлик қирғоқ чизиғида майин қумли кўплаб пляжларга эга. Мовий байроқли Қум Денгизи пляжи эрта тонгда қуёш чиқишини кузатиш учун энг муносиб манзилдир. Урла қуёшли, илиқ Эгей иқлимига эга бўлгани учун туш пайти шаффоф сувга шўнғиш ёки қирғоқда дам олиш ва ажойиб манзаралардан баҳра олиш мумкин.
Урла ошхона маданияти
Мусаффо иқлими ва унумдор ерларидан илҳомланган Урла диёри айни вақтда пазандачилик мўъжизаси ҳамдир. Шаҳарнинг ўзига хос лаззатлари, зайтун мойи, ўтлари, янги денгиз маҳсулотлари ва хуштаъм ичимликлари Эгей ошхонасининг ўзагини ташкил қилади. Урланинг микроиқлими узумчилик учун қулай бўлганлиги боис қадимдан виночилик маркази бўлган. Узумзорлар бўйлаб сайр қилиш, турли ноёб узум навларини, ҳатто бир пайтлар унутилган маҳаллий навлар, жумладан, Урла Караси, Фоча Караси ва Гайдурани ҳам бу ерда учратиш мумкин. Узум кашфиёти ҳақидаги ҳикояларни биринчи оғиздан эшитиш чиндан ҳам унутилмас тажрибадир.
Урлада фермадан дастурхонгача ёндашуви билан ушбу ерларнинг неъматларидан фойдаланиб, яхши хизмат кўрсатадиган кўплаб сифатли ресторанларга дуч келасиз. Ушбу ресторанлардаги ёш ошпазлар Урланинг азалий таомларини замонавий рецептлар билан талқин қилиб, маҳаллий маҳсулотларни унутилмас таърифларга айлантирадилар. Ушбу пазандалик маҳорати туфайли шаҳарнинг баъзи ресторанлари муносиб Мишел юлдузларига сазовор бўлишди. Урлада Мишел Green Star ва Sommelier мукофотларига эга ресторанлар ҳам бор. Бундай овқатланиш жойларида юқори сифатли ичимликлар билан бирга қушқўнмас, арапсочи ва артишок каби мавсумнинг машҳур ўтларидан иборат соғлиқ учун фойдали кенг танловдан баҳраманд бўлишингиз мумкин.
Ўтмишга сайр қилинг
Урла Онадўли ўлкаларининг шонли тарихига кириш эшикларидан биридир. Урла тарихи Туркиянинг биринчи сув ости қазишмалари амалга оширилган Лиман тепанинг бронза даври майдонидан бошланади. Шаҳарнинг шимолий қисмида жойлашган Клазомения антик даврнинг муҳим портларидан биридир. Қадимги шаҳар дунёдаги биринчи зайтун мойи устахонаси билан бу ерлардаги зайтунларнинг чуқур илдиз отган тарихини ҳикоя қилади.
Яқин атрофдаги ЮНEСКОнинг Эфес майдони ва Селс кутубхонаси каби диққатга сазовор вайроналар ўтмиш қаърига ажойиб саёҳатга чорлайди. Бундан ташқари, Эфес ёзда юлдузлар остида тунги ташрифлар учун очиқ бўлиб, Тунги музейлар лойиҳасининг бир қисми сифатида ноёб тажриба тақдим этади.
