Европанинг энг йирик порти Россия билан эҳтимолий урушга тайёргарлик кўрмоқда — Financial Times
«Роттердам порти NATO таъминот кемалари учун жой ажратишни бошлаган ҳамда уруш шароитида юк ташиш режасини ишлаб чиқмоқда», деб ёзади газета.
Роттердам порти директори Будевейн Симонс Financial Times’га берган интервюсида ҳозирда Европадаги иккинчи йирик порт ҳисобланувчи Антверпен билан музокаралар олиб бораётганини маълум қилган. Гап Буюк Британия, АҚШ ва Канададан келадиган кемалар ва юкларни қабул қилиш режасини мувофиқлаштириш ҳақида кетмоқда.
Унинг сўзларига кўра, Роттердам Антверпен ва бошқа портларга мурожаат қилиб, юк оқимининг бир қисмини ўз зиммасига олишни сўрамоқчи. Ҳозирда Антверпен порти Европада жойлашган АҚШ ҳарбий кучлари учун етказиб бериладиган юкларни қабул қилмоқда. Роттердам порти томонидан кўрилаётган чора-тадбирлар Европада Москва билан бўлиши мумкин бўлган эҳтимолий можаро ҳолатига тайёргарлик доирасидаги умумий саъй-ҳаракатларнинг бир қисми экани таъкидланмоқда.
FT’нинг қайд этишича, Европа Иттифоқи қуролланишни кучайтириш учун 800 миллиард еврогача маблағ ажратишни ва мудофаа соҳасида АҚШ ёрдамига камроқ таянишни режалаштирмоқда.
