Эрларингни «ухлатиш»ни яна битта йўли!.. (видео)

Кечаси. Соат ўн икки-ю ўттиз. Эр пишиллаб ухлаяпди. Хотин эса безовта. Чунки эртага гапга бориши керсак. Унга пул керак. Эри бермади… Хў-ў-ш! Бирдан хотиннинг калласи ишлаб қолди. Нимайди, жарима бормиди? Ҳозир «есть» қиламиз.

— Ҳой дадаси… туринг. Туринг!

— Қўйсангчи, ширин уйқумни бузма!..

— Турсангизчи, туринг!..

— Нима дейсан?! — деб эркак зўрға кўзини очади.

— Ичингиз бузилибди.

— Деразани очиб қўй.

— Бўлмайди. Боринг кўчага чиқиб бир айланиб келинг.

— Эсинг жойидами?

— Ҳа, боринг! — деб овозини баландлатади, аёл.

Болалар уйғониб кетишидан. Оталарига ёмон кўз билан қарашларидан қўрққан, эркак секин оғриниб ўрнидан туради. Ва эснаб қўядида ташқарига чиқиб кетади.

Шу кетишда бир соат йўқ бўлиб кетади. Кейин барибир қайтади.  Хотин эса унинг кетишини ҳам, қайтиб келишини ҳам видеога олади. Ва керакли жойга жўнатиб юборади.

Жарима отнинг калласидай. Ўша жариманинг ўттиз фоизи хотиннинг қўлига тушиб, турибди. Зўр-ку.

Шу воқеадан кейин кўчада қора кўз ойнак тақиб юрган аёлларнинг сони кескин ошиб кетибди. Чунки уларнинг ҳаммасини кўзларининг таглари кўкариб кетган эди!..