…Қотил, талончи ва зўравон бир ярим миллион аскар уйига қайтса!..
“ТАРИХДАН ҚЎРҚУЛИК”
Машҳур совет ва россиялик кинорежиссёр ва ёзувчи Эдуард Топол АҚШ президенти Дональд Трампга очиқ хат билан мурожаат қилди.
(Шу хатдан парча)
Ҳурматли Жаноб Президент!
Азиз Дональд!
Мен Россия ҳақида элликта китоб ва ўнлаб фильм муаллифи сифатида, Сизнинг Путин билан учрашувингиздан олдин айрим ҳақиқатларни етказишга ўзимни ҳақли деб биламан.
Сиз билиб қўйишингиз керак: у Украинада урушни тўхтата олмайди. Ҳатто, агар Сиз унга Палм-Бичдаги Мар-а-Лаго виллангизни, Нью-Йорктаги Трамп-тауэрингизни ва бир нечта голф-клубларингизни совға қилсангиз ҳам.
Бунинг сабаби унинг урушни тўхтатишни истамаслигида эмас, балки ҳақиқатан ҳам бу иш унинг қўлидан келмаслигидадир. Чунки у Мединскийнинг “тарих дарслиги”дан эмас, ҳақиқий рус тарихидан яхши хабардор:
• Наполеон устидан ғалабадан кейин рус қўшинларининг Европадан қайтиши 1825 йилда «декабристлар» қўзғолонига олиб келди.
• Россиянинг рус-япон урушидаги мағлубияти 1905 йилги инқилобни келтириб чиқарди.
• Биринчи жаҳон уруши пайтида миллион рус аскарининг фронтдан қочиши Николай II тахтдан воз кечиши ва 1917 йилги Февраль инқилобига сабаб бўлди.
• Лениннинг Германия билан тузган сулҳи большевикларга подшоҳ оиласини отиб ташлаш имконини берди.
• 1989 йил февралида совет қўшинларининг Афғонистондан қайтиши СССР парчаланишининг бошланиши бўлди.
Шунинг учун Путин Украинадаги ўзи бошлаган урушга нуқта қўя олмайди, чунки қўшинларини уйга қайтаришга жасорати йўқ.
Фақат Сталинга 1945 йил майида армиясининг катта қисмини Европада «ишғолчи қўшин» сифатида қолдириш имкониятигина уни урушдан кейинги давлат тўнтаришидан қутқарган эди.
У яхши эслайди: 1989 йилда Афғонистондан қайтган 525 минг аскар «афғончи-бандитлар»га айланиб, бутун СССР аҳолисини таҳликада ушлаган эди.
Шу боис, агар Украина фронтидан ўзига қотиллик, талончилик ва зўравонликни касб қилиб олган бир ярим миллион аскарлар уйига қайтса, Россия қандай аҳволга тушишини Путин жуда яхши тушунади.
Украина билан уруш Путинга ўз тузумига қарши бўлган икки миллион фаол гражданлардан қутулиш имконини берди – уларни мамлакатдан қочишга мажбур қилди. Қолган ёш йигитларни эса ё фронтга йўллади, ёки жазоловчи тузилмаларга жалб қилди…
Ҳурмат билан,
Эдуард Топол
Жалолиддин Сафоев таржимаси
