Ака, ёмон ҳам «тўкилибсиз»!!!
* Бугун домла бўлдим!
Бир «пара» дарс ўтдим!
Самарқанд давлат чет тиллар институти раҳбарлари мени бугун биринчи босқич талабаларига «Мустақиллик дарси» ўтиб бериш учун таклиф қилишди.
Талабалар бўлажак ҳамкасбларим экан! (Бу институтда журналистика факультети борлигини бугун билдим!)
Мен 17-18 ёшли ёш йигит-қизларнинг кўзларида шижоат, Ҳақни излаш, Ҳаққа талпиниш учқунларини кўрдим!
Каримбердига роса топилди-ку?
Бўлажак журналистларнинг мустақиллик ҳақидаги фикрларини остин-устин қилиб ташладим. Бир пара дарсда камида 50 марта «Вау!» «Во-ой!» «Йўғ-эй?!» «Э-э-э!» «И-и-и!» «Наҳотки?!» деган ҳаяжонли изҳорлар янгради!
Мендан кейин энди бирорта домла бу талабаларни «Каримов мустақиллик меъмори» эканига ишонтира олмайди!
Мендан кейин энди бирор инсон бу талабаларни Мустақиллик 1991 йил 1-сентябрда бўлганига ишонтира олмайди!
Мендан кейин энди бирор инсон Мустақиллик учун, ўзбек тили учун майдонларга дўппи кийган оддий инсонлар чиққанини, улар ўқ еганини, улар Мустақиллик учун жон берганини, қон тўкканини билган бу талабаларни Мустақиллик учун Каримов ёки бошқа «каттаконлар» курашганига ишонтира олмайди!
Мендан кейин энди бирор инсон 1990 йилдаёқ қабул қилинган Мустақиллик Деклорациясини кимлар ёзганини билиб олган бу талабаларни бошқа нарсага ишонтира олмайди!
Энди улар Кўкбўридек мард ва ёвқур бўлишга бел боғлашади, чунки, мен уларга «КЎКБЎРИ»ни ўқиб бердим. Кўкбўридан мерос ёвқурликнинг кичик бир уруғини уларнинг қалбига ташладим! Инша Аллоҳ, бу уруғ кўкаради ва мева беради!
Агар бу ёш ниҳолларнинг миясини «ювиб» ташлашмаса!
Айтганча, бўлажак журналистларга ўзимнинг шиоримни айтдим: «Қўрқсанг – ёзма! Ёздингми – қўрқма!»
Яна уларга журналистиканинг ўлмас қонунини эслатдим: «Яхши журналист бўлсанг – отиласан, ёмон журналист бўлсанг, қарғишга қоласан!» Ўзбекистонда эса, рост ёзсанг, Ҳақни ёзсанг, миллат дардини ёзсанг, халқнинг дуосини оласан, аммо ё отиласан ё қамаласан! Ёлғонни ёзсанг, «каттакон»ларга маддоҳлик қилсанг, халқнинг қарғишига қоласан, аммо ҳар Мустақиллик байрамида орден оласан!»
Орден ёстиқчаларда қолади, қабрга ҳам бирга кира олмайди, на дунёда, на охиратда фойдаси бўлмайди! Халқ дуоси эса, сени жаннатга олиб киради!
«Ўзларинг танланглар, сизларга орден, унвон мукофот керакми, миллат дардига дармон бўлиш керакми?» дедим.
Талабалар бугун иккинчисини танлашди!
Мен шунга ишонаман!
Каримберди Тўрамурод
