Венгрияда антиқа чемпионат ўтказилди
Венгриянинг Сексард шаҳрида қабр қазиш бўйича XVIII чемпионат бўлиб ўтди.
Тадбир Венгрия операторлари ва қабристонларга хизмат кўрсатувчилар уюшмаси (MTFE) томонидан ташкил этилди.
«Танловнинг мақсади – гўрков ҳамкасбларимиз меҳнатини эътироф этиш… Уларнинг кундалик иши нафақат жисмоний тайёргарликни, балки улкан маънавий куч ва профессионалликни ҳам талаб қилади», дейилади ташкилотчилар хабарда.
MTFE Sírásó Verseny номи билан танилган танлов 2016 йилдан бери ўтказилмоқда. Тадбирдан кўзланган мақсад – гўрковлик касбининг нуфузини ошириш, «ёшларни меҳнатга жалб этиш ҳамда маҳоратини намойиш этишдан» иборат.
Иштирокчилар икки кишилик жамоаларда беллашади. Вазифа шундан иборатки, чекланган вақт ичида узунлиги 200 см, кенглиги 80 см ва чуқурлиги 160 см бўлган қатъий стандартларга жавоб берадиган қабрни қазиш керак. Бажарилган ишнинг тезлиги, ўлчамларининг аниқлиги ва эстетикаси билан баҳоланади. 2025 йилги мусобақада барча совринли ўринларни венгрияликлар қўлга киритди.
