Мен биз осмондан тушиб қолган бўлсак керак, деб ўйлардим!..

Орий ирқидан бошқа ҳаммага ўз тарихини унуттириш ёки орий ирқига қарамлик туйғусини тарғиб қилиш бу нацизм идеологиясининг бир қисми.

Нацизм идеологиясининг иккинчи қисми Коммунизм мафкурачилари томонидан ўрис халқини улуғлаш, қолган халқларни ўрисларга қарам қилиш ишларида қўлланилди.

Ўрисларни улуғлаш ва барча халқларни ўрисларга қарам аҳволга олиб келиш ишларининг қолган қутгани эса бугунги кунда Россия Федерацияси томонидан амалга оширилиб келинмоқда.

Шу кунларда Пауль Йозеф Геббельс фикрларини ўқиш билан машғулман. Жуда ажойиб кўрсатмалар қолдириб кетибди, жонивор.

Ҳозирги Россия Федерациясининг Масс Медияси асосан шу кишининг доктриналари асосида ишлаётгани яққол кўриниб турибди.

Совет мафкурасининг тарафдорлари ва ҳозирги Россия сиёсати тарафдорлари бир нарсани яхши билишлари лозим.

Айнан Россиядаги коммунизм идеологияси билан Гитлер Германиясидаги нацизм идеологияси иккаласи бир хил ном билан Социализм идеологияси деб аталарди.

Бу идеологияни кучайтирган Геббельс эса Лениннинг энг яқин дўсти ва йўлдоши бўлган Вилли Мюнценбергнинг шогирди бўлган.

Вилли Мюнценберг ким эди?

Тарих бешафкат ва унинг бошқа томонлари ҳам бор. Кимгадир ёқмас. Лекин бир тарихчи сифатида айтиб ўтишни ўзимнинг ҳаққим ва бурчим деб биламан.

Миллий тарихимизни унутишга даъват қилиш, ўтмишимиздаги тарихий шахсларни унутишга чақириш бу ҳайвонлик йўлига чақириш билан баробар. Ҳайвонда фикр ва ақл бўлмайди. Фақат шартли ва шартсиз рефлекслардан иборат ҳайвоний инстинктлар бўлади.

Одамнинг ҳайвондан фарқи айнан ўз тарихини билишдан бошланади. Тарих кенг қамровли илм. Кечаги яшаган бир кунинг ва ундан олдинги кунинг ҳам тарих, аслида.

Ўтмиш билан бугунги кунимиз ҳақидаги фикримиз келажакни белгилайди. Ўтмишини билмаганнинг келажаги йўқ.

Нафақат давлат ва миллат, балки ҳар бир оила, ҳаттоки ҳар бир инсон ҳам ўтмишини билиши шарт. Агар тарихини билмаса ва тарихдан тегишли хулоса чиқара олмаса, унда инқирозга юз тутиши муқаррар.

Миллий тарихимиз ҳақида гапирсак, баъзи бир «ақллилар» тарихни сиёсийлаштириш керак эмас деб чириллаб қолишади.

Билмадим, балки Математика, Химия, Биология ва Физика фанлари сиёсатсиз ўқитилиши мумкиндир. Лекин Тарих фани айнан сиёсатнинг ўзи ва сиёсат ҳақидаги фан.

Битта-иккита тарихдаги воқеаларни билиш билан ёки бир нечта тарихий мавзуларни ёдлаб олиш билан тарихни сиёсатсиз тушунтираман деб ҳаракат қиладиганлар бўлса, бундайлар умуман тарих ҳақида гапирмагани яхши.

Тарих айнан сиёсат илмининг пойдевори ва сиёсатнинг методик қўлланмаси.

Яъни, Тарих бу Сиёсатнинг негизидир. Агар кимда ким сиёсатни гапиришдан қўрқса жимгина Химия, Биология, Математика, Физика фани ҳақида гапираверсин.

Айтмоқчи, «Тарихни ғолиблар ёзади, шунинг учун ютқазганлар эсга олинмайди», деган иборани омма онгига биринчи бўлиб Артур (Антон) Дрекслер деган сиёсатчи киритган.

Артур (Антон) Дрекслер ким эди ?

Артур (Антон) Дрекслер НСДАП – национал-социалист ишчилар партиясини ташкил қилган сиёсатчи эди. Яъни 1933-1945 йиллар оралиғида Германияни бошқарган нацистлар партиясининг 20.02.1920 дан 29.07.1921 йилгача бошлиғи эди. Унинг ўрнига Адольф Шикльгрубер (Гитлер) бошлиқ бўлди.

«Тарихни ғолиблар ёзади, шунинг учун ютқазганлар эсга олинмайди» деган иборани Фашизм идеологиясининг асосчиларидан бири дунё тарихчилари қўлланадиган иборага айлантирган.

Шўҳрат Барлос