Муроджон Аҳмадалиев, Исроил Мадримов ва Баҳодир Жалолов Тўлқин Қиличевга Меrcedes совға қилишди

Ўзбекистонлик профессионал боксчилар Муроджон Аҳмадалиев, Исроил Мадримов ва Баҳодир Жалолов устозлари Тўлқин Қиличевга автомобил совға қилишди. Бу ҳақда Tribunauz хабар берди.

Боксчилар 1 октябр — устоз ва мураббийлар куни муносабати билан 42 ёшли мутахассисга Mercedes беришди.

Тўлқин Қиличев 2022 йил августида бокс бўйича Ўзбекистон миллий жамоасига бош мураббий этиб тайинланганди. Унинг қўл остида жамоа 2023 йилда ўтказилган жаҳон чемпионати ва 2024 йилда ўтказилган жаҳон кубоги мусобақаларида умумжамоа ҳисобида биринчи ўринни эгаллади. Шунингдек, 2024 йилда Парижда ўтказилган Олимпиада ўйинларида ўзбекистонлик боксчилар 5 та олтин медал қўлга киритишди.

Осиё бокс конфедерацияси 2024 йилда Тўлқин Қиличевни қитъада йилнинг энг яхши мураббийи деб топган.