CNN: Трамп Чикагога Миллий Гвардия қўшинларини киритишни буюрди
Оқ уй вакили Эбигейл Жексоннинг маълум қилишича, АҚШ президенти Доналд Трамп “назоратдан чиқиб кетган жиноятчиликка қарши курашиш” мақсадида Миллий гвардиянинг 300 нафар ҳарбий хизматчисини Чикагога жўнатишни буюрган.
Ҳозирда Қўшма Штатларнинг Чикаго ва бошқа айрим шаҳарларида федерал ҳукуматнинг иммиграция сиёсатига қарши намойишлар ўтказилмоқда.
Трампнинг ҳарбийларни Чикагога юбориш қарорини Иллинойс штатининг демократ губернатори Жей Роберт Прицкер танқид қилди. У бу ҳаракатни «жамоат хавфсизлигини таъминлашга ҳақиқий уриниш эмас, балки саҳналаштирилган кўрсатма» деб атади.
АҚШ президенти Доналд Трамп бундан олдин Лос-Анжелес, Вашингтон, Портлэнд ва Мемфис шаҳарларига ҳам миллий гвардия қўшинларини киритишни буюрган эди. Юқоридаги шаҳарларнинг барчасини Демократик партия вакили бўлган мэрлар бошқаради.
