Буюк Британия «Роснефть» ва «Лукойл»ни санкциялар рўйхатига киритди

Буюк Британия расмийлари санкциялар рўйхатини янгилаб, унга Россиянинг «Роснефть» ва «Лукойл» компанияларини ҳам қўшди.

Иккала компания ҳам «стратегик ва иқтисодий аҳамиятга эга бўлган соҳада бизнес юритиш орқали Россия ҳукуматини қўллаб-қувватламоқда», — дейилади санкциялар рўйхатида.

Буюк Британия «Роснефть» раҳбари Игорь Сечинга нисбатан шахсий санкцияларни 2022 йил март ойида, «Лукойл» раҳбари Вагит Алекперовга нисбатан эса 2022 йил апрель ойидан бошлаб жорий қилганди, деб эслатди Meduza.

Британия санкциялари рўйхатида аввалдан «Роснефть» раҳбарияти вакиллари, шунингдек, иккала компания билан боғлиқ баъзи судлар ҳам бор эди.

15 октябрь куни янгиланган рўйхатга Ҳиндистоннинг Nayara Energy компанияси ҳам киритилган бўлиб, унинг эгаси «Роснефть» ҳисобланади.

Санкциялар, хусусан, қора рўйхатга киритилган жисмоний ва юридик шахсларнинг барча активлари Буюк Британия ҳудудида музлатиб қўйилишини англатади.

Уруш сабаб «Роснефть» ва «Лукойл» Европа Иттифоқи санкциялари остида қолганди, бироқ АҚШ «Роснефть» ва «Лукойл»га нисбатан санкциялар киритмаган.