Ироқ АҚШни базадан ҳайдаб чиқарди

Ироқ мудофаа вазирлигининг маълум қилишича, АҚШ қўшинлари мамлакатнинг ғарбида жойлашган Аин ал-Асад авиабазасидан тўлиқ чиқиб кетган. Энди базанинг бошқаруви бутунлай Ироқ армиясига ўтган. Бу база узоқ йиллардан буён АҚШ ва коалиция кучлари (бир мақсад учун бирлашган давлатлар ёки гуруҳлар жамияти) томонидан ишлатилган.

2024 йилда Вашингтон ва Бағдод АҚШ етакчилигидаги коалиция кучларини Ироқдан чиқариш ва икки томонлама хавфсизлик алоқаларига ўтиш бўйича келишувга эришганди. Аин ал-Асад авиабазаси минтақадаги кескинлик даврида, хусусан 2020 йилда Эрон генерали Қосим Сулаймони ўлдирилгандан кейин, Эрон тарафдори қуролли гуруҳлар ҳужумига учраган.

Ироқ армияси вакили АҚШ кучлари базадан чиқиб кетганини тасдиқлади, бироқ логистика билан боғлиқ баъзи масалалар туфайли бир неча ҳарбий ходим базада қолганини айтди. Қўшимча маълумот хавфсизлик сабабли ошкор қилинмади.

Дастлабки режа бўйича юзлаб аскарлар 2025 йил сентябрига қадар, қолганлари эса 2026 йил охиригача Ироқдан чиқиб кетиши белгиланган эди. Ҳозирча чиқишнинг аниқ қачон бошланганлиги расмий равишда эълон қилинмаган.