Хайриддин Султоновга “Ўзбекистон халқ ёзувчиси” унвони берилди
Ўзбекистон Президенти маслаҳатчиси ва президент нутқлари устида ишловчи муаллиф Хайриддин Султонов “Ўзбекистон Республикаси халқ ёзувчиси” фахрий унвони билан тақдирланди. Давлат раҳбари Шавкат Мирзиёев тегишли фармонни имзолади.
Расмий ҳужжатда таъкидланишича, унвон Султоновнинг давлат идораларидаги кўп йиллик фаолияти, ўзбек адабиёти ва маданияти ривожига қўшган салмоқли ҳиссаси, тарихий ҳамда замонавий мавзуларда яратилган таъсирчан асарлари, ёш авлодни Ватанга муҳаббат ва мустақиллик ғояларига садоқат руҳида тарбиялашдаги хизматлари учун берилди. Шунингдек, у мамлакатнинг ижтимоий-сиёсий ҳаётидаги фаоллиги билан ҳам эътироф этилган.
Қарор ёзувчининг 70 йиллиги муносабати билан қабул қилинган. Хайриддин Султонов Тошкент вилояти, Қибрай туманидаги Тузел посёлкасида туғилган. ТошДУнинг журналистика факультетини битирган, “Гулистон” ва “Ёшлик” журналларида, шунингдек, адабиёт ва санъат нашриётида фаолият юритган.
1993 йилдан у Президент аппаратида турли раҳбарлик лавозимларида ишлаган, жамоатчилик билан алоқалар, маданият ва матбуот масалалари бўйича давлат маслаҳатчиси бўлган. 1999–2003 йилларда эса Олий Мажлис депутати сифатида фаолият олиб борган.
Хайриддин Султонов бир қатор ҳикоя ва қиссалар тўпламларининг муаллифи. Унинг асарлари орасида “Қуёш ҳаммага баробар”, “Бир оқшом эртаги”, “Она замин” ҳамда “Ҳаёт давом этади…” каби китоблар бор. Ижодида Бобур сиймоси алоҳида ўрин тутади: бу мавзу “Саодат соҳиллари” қиссаси ва замонавий ўзбек насрида сезиларли ҳодиса сифатида қайд этилган “Бобурий-нома” маърифий романида кенг ёритилган.
