Дубайда жанжал уюштирган ўзбекистонликлар ўлимга ҳукм қилинди (видео)
Бирлашган Араб Амирликлари нашрлари мазкур иш бўйича кеча, 22 январь куни суд ҳукми эълон қилгани ва унга кўра, 6 киши ўлимга, яна бир киши эса умрбод қамоқ жазосига ҳукм қилингани ҳақида хабар тарқатди. Ўзбекистон Ташқи ишлар вазирлиги матбуот котиби Аҳрор Бурхоновнинг билдиришича, ҳали тасдиқланган расмий хабар БАА томонидан берилмаган.
“Олинган маълумотларга қараганда, улар умрбод жазога ҳукм қилинган”, дейди Бурхонов. Қайд этиш жоиз, бунгача Бирлашган Араб Амирликларида Молдова–Исроил фуқароси Цви Коганни ўғирлаш ва ўлдиришда айбланган ўзбекистонликлар ўлим жазосига ҳукм қилингани, кейинчалик эса Туркия уларни ҳимоя қилиб чиққани ҳақида хабарлар тарқалган эди.
Дубайдаги жанжал
2025 йилнинг апрель ойида Дубайдаги бензин қуйиш шохобчасида ўзбекистонликларнинг икки гуруҳ ўртасида жанжал солир бўлган эди. Можаро вақтида 2 нафар Ўзбекистон фуқароси ҳалок бўлган. Ҳодиса қурбонлар ўз автомобилларининг шинаси ҳаво босимини текширтириш учун шохобчага келган пайтда, илгари юз берган низо ортидан бошланган. Воқеа содир бўлган вақтда яқин атрофда бўлган полиция ходими дарҳол расмийларга хабар берган.
Тергов давомида аниқланишича, икки гуруҳ алоҳида машиналарда шохобчага келган. Қурбонлардан бири қизил рангли Mercedes автомобилидан тушиб, шинани текшираётган пайтда унга бир гуруҳ эркак ҳужум қилган. Иккинчи жабрланувчи эса қочишга уринган, бироқ бошқа бир гуруҳ томонидан ушланиб, унга ҳам зўравонлик қилинган.
Воқеа жойига етиб келган Дубай полицияси ҳудудни текширган ва можаро иштирокчилари томонидан қолдирилган буюмларни далил сифатида олган. Воқеа жойидаги кузатув камераларидан олинган ёзувлар ва гувоҳларнинг кўрсатмалари ёрдамида ҳуқуқ-тартибот органлари ҳодиса тафсилотларини аниқлашга муваффақ бўлган.
Олиб борилган тезкор тергов натижасида ҳодисага алоқадор 11 киши, шу жумладан бош гумондорлар бошқа бир амирликдаги меҳмонхонада ҳибсга олинган. Сўроқ вақтида улар ҳодисада иштирок этганини тан олиб, бунга олдинги зиддиятлар сабаб бўлганини айтган.
Расмийлар воқеа шахсий низо асосида келиб чиққанини, иштирокчилар бир-бирларини илгари танигани ва шахсий келишмовчиликлар мавжуд бўлганини тасдиқлаган. Иш қўшимча юридик чора-тадбирлар кўриш учун прокуратурага топширилган. Дубай полицияси бундай зўравонлик ҳолатлари шаҳарда камдан кам учрашини, Дубай эса дунёдаги энг хавфсиз шаҳарлардан бири бўлиб қолаётганини маълум қилган.
Олдинроқ эса БАА суди ўтган йилнинг ноябрь ойида Бирлашган Араб Амирликларида яҳудий раввини Цви Коганни ўлдиришда гумон қилиниб ушланган уч нафар ўзбекистонликни ўлимга ҳукм қилганди. Ўзбекистон Ташқи ишлар вазирлиги ҳам QALAMPIR.UZ’га БААда ўзбекистонликлар ўлимга ҳукм қилинганини тасдиқлади.
