Ўлганларидан кейин обрулари ошиб кетди!
Россияда уруш қатнашчиларини дафн этиш учун рекорд миқдорда маблағ ажратилди
“Верстка” нашри ҳисоб-китобларига кўра, Россия ҳукумати 2025 йилда Украинага қарши урушда ҳалок бўлган ҳарбийларни дафн этиш ва улар хотирасига ёдгорликлар қуриш учун тахминан 130 миллион рубль ажратган. Бу маблағлар “Госзакупки” порталида жойлаштирилган давлат харидлари шартномалари асосида аниқланган.
Маълум қилинишича, 2025 йилда уруш қатнашчилари хотирасига бағишланган ёдгорликлар учун камида 111 миллион рубль, ҳалок бўлган ҳарбийларни дафн этиш маросимларига эса 17,8 миллион рубль йўналтирилган. “Верстка” таъкидлашича, бу — тўлиқ кўламли уруш бошланганидан бери энг юқори кўрсаткич ҳисобланади.
Солиштириш учун:
— 2022 йилда бундай харидлар умуман амалга оширилмаган;
— 2023 йилда ёдгорликлар учун 880 минг рубль, дафн маросимлари учун эса 5,2 миллион рубль сарфланган;
— 2024 йилда эса ушбу мақсадларга мос равишда 24,5 миллион ва 11,8 миллион рубль ажратилган.
Нашр маълумотига кўра, 2025 йилда ҳарбийларни дафн этиш билан боғлиқ шартномалар энг кўп Новосибирск вилояти, Коми Республикаси ва Чукотка ҳудудларида қайд этилган. Шу билан бирга, журналистлар таъкидлашича, урушда ҳалок бўлганларни дафн қилиш учун ажратилаётган маблағларнинг барчаси ҳам “Госзакупки” орқали ўтмайди.
Россиянинг урушдаги йўқотишлари бўйича рақамлар турлича баҳоланмоқда. НАТО маълумотига кўра, тўлиқ кўламли ҳужум бошланганидан бери ҳалок бўлган ва яраланган россиялик ҳарбийлар сони 1,15 миллион нафарга, ҳалок бўлганлар эса тахминан 250 минг нафарга етган.
Украина Қуролли кучлари Бош штаби эса уруш давомида 1,2 миллиондан ортиқ россиялик аскар ҳалок бўлгани ёки яраланганини маълум қилган.
НАТО бош котиби Марк Рютте 21 январ куни Давос шаҳрида ўтган Жаҳон иқтисодий форумида сўзга чиқиб, фақат 2025 йил декабрь ойининг ўзида Украинага қарши урушда 30 мингдан ортиқ россиялик аскар ҳалок бўлганини айтган.
Россия Мудофаа вазирлиги эса ўз йўқотишлари ҳақида расмий маълумотларни узоқ вақтдан бери эълон қилмаяпти. Шу билан бирга, BBC рус хизмати ва “Медиазона” журналистлари 2025 йил январ ойи ўрталарига келиб урушда ҳалок бўлган 163 мингдан ортиқ россиялик ҳарбийнинг исмма-исм рўйхатини тузишга муваффақ бўлган.
