Ўзбекистон армияси минтақада етакчи: янги рейтингда нечанчи ўринда?

Global Firepower Index’нинг янгиланган рейтингида Ўзбекистон Қуролли Кучлари 145 та давлат орасида 53-ўриндан жой олди. Рейтингни тузган мутахассислар армияларни 60 дан ортиқ кўрсаткич асосида баҳолайди: мудофаа харажатлари, техник таъминот, шахсий таркиб сони, танклар, самолётлар, кемалар, логистика, ресурслар, география ва бошқа муҳим омиллар шу рўйхатда бор.

Қизиғи, Марказий Осиёда Ўзбекистон биринчи ўринга чиқди. Қўшнилар орасида Қозоғистон 58-ўрин, Туркманистон 78-ўрин, Тожикистон 100-ўрин, Қирғизистон 109-ўрин, Афғонистон эса 121-ўринда қайд этилган.

Собиқ СССР давлатлари кесимида ҳам Ўзбекистон юқори натижа кўрсатди: умумий рўйхатда учинчи ўрин, яъни фақат Россия (2-ўрин) ва Украина (20-ўрин) армияларидан кейин.

Рейтингнинг дунё миқёсидаги Топ-10 қисмида эса қуйидаги давлатлар пешқадам сифатида келтирилган:

1 АҚШ

2 Россия

3 Хитой

4 Ҳиндистон

5 Жанубий Корея

6 Франция

7 Япония

8 Буюк Британия

9 Туркия

10 Италия

Хулоса шу: рақамлар “ҳаммаси зўр” дегани эмас, лекин тенденция ёмон эмас — Ўзбекистон минтақада позицияни ушлаб турибди. Энди энг муҳими, рейтингдаги ўрин эмас, реал тайёргарлик, технология ва кадр сифатини узлуксиз ошириш.