Орбан: «Европа Иттифоқи аллақачон уруш ҳолатига кириб бўлган!»
Венгрия бош вазири Виктор Орбаннинг айтишича, Европа Иттифоқида зарурат туғилган тақдирда Украинага ҳарбий қўшин юборишни назарда тутувчи ҳужжат аллақачон имзоланган. Шу боис, унинг фикрича, Европа Иттифоқи ҳали урушга киришиш арафасида эмас, балки амалда аллақачон уруш ҳолатида.
Орбан аввалроқ ҳам Европа етакчилари 2030 йилга бориб Россияга қарши урушни бошлашга жиддий тайёргарлик кўраётганини айтган ва Венгрия бундай тўқнашувда иштирок этмасликка ҳаракат қилиши кераклигини таъкидлаган эди.
— Ҳатто ҳозирнинг ўзида ҳам зарурат бўлса, ҳарбийлар Украинага юборилишини кўзда тутувчи имзоланган келишув мавжуд. Демак, Европа урушга киришмоқчи эмас, у аллақачон кириб бўлган. Европа аллақачон урушмоқда. Фақат масала шуки, бунинг оқибатлари ҳаётимизга қай даражада тез таъсир қила бошлайди, — деди Орбан Венгриянинг Капошвар шаҳрида ўтказилган тадбирда сўзлар экан.
Тадбирдан тўғридан-тўғри эфирни маҳаллий телеканал олиб борган.
