Сурхондарёда инспекторга пора бермоқчи бўлган ҳиндистонлик ушланди
Сурхондарёда инспекторга пора таклиф қилган ҳиндистонликка нисбатан жиноят иши очилди. Бу ҳақда Ички ишлар вазирлиги хавфсизлик департаменти хабар қилди.
Қайд этилишича, ЙПХ ходими техник носоз бўлган машинани бошқариб юрган чет эл фуқаросини тўхтатиб, унинг ҳужжатларини текширмоқчи бўлганида, хорижлик фуқаро инспекторга 10 миллион сўм пора таклиф қилган.
Ходимнинг билдиргиси асосида тезкор тадбир ўтказилиб, Ҳиндистон фуқароси инспекторга пулларни бермоқчи бўлган вақтида ушланди.
Ушбу шахсга нисбатан жиноят иши очилиб, тергов ҳаракатлари ўтказилмоқда.
Жиззахда ҳам йўл-патрул хизмати инспекторига пора таклиф қилган шахс қўлга олингани хабар қилинганди. Қоидабузар спиртли ичимлик истеъмол қилган бўлган.
Бошқа бир вазиятда эса Андижонда 1000 доллар порани олмаган инспектор 20 миллион сўм билан мукофотланганди. Фуқаро ўзи устидан 102 рақами орқали тушган мурожаат бўйича юритилаётган ҳужжатларни расмийлаштирмасдан, уларни йўқ қилиб, қонуний чора кўрмаслик эвазига пул таклиф қилган.
