Миллионер бўлмасанг, футбол томоша қилма!
The Athletic нашрининг шов-шувли хабарига кўра, АҚШ ҳукумати Африка давлатларидан келадиган мухлислар учун кутилмаган ва «адолатсиз» шарт қўйди. Энди футбол кўриш учун фақат чипта сотиб олиш кифоя эмас. Жазоир, Тунис, Кот-д’Ивуар, Сенегал ва Кабо-Вердедан келувчи мухлислар АҚШ туристик визасини олиш учун нақ 15 000 доллар миқдорида гаров пули қўйишлари керак. Бу маблағ мухлис ўз юртига қайтганидан кейингина қайтариб берилиши айтилмоқда.
АҚШ расмийлари бу чорани Африкадан келувчи мухлисларнинг чемпионатдан сўнг мамлакатда ноқонуний қолиб кетишининг олдини олиш билан изоҳлашмоқда. Аммо бу талаб футбол ишқибозлари ўртасида ҳақиқий «портлаш» ҳосил қилди. Кўпчилик буни «камбағал давлатларни очиқдан-очиқ камситиш» ва «футболни бизнесга айлантириш» деб атамоқда.
Сенегал ва Жазоир каби давлатларнинг футбол фанатлари ижтимоий тармоқларда АҚШнинг бу қарорига қарши чиқишмоқда. 15 000 доллар — бу Африкадаги ўртача оиланинг бир неча йиллик даромади. Бу дегани, оддий мухлис учун ЖЧ-2026 эшиклари бутунлай ёпилди.
