Месси футбол тарихидаги энг зўр футболчи, Роналду иккинчи
“Барселона” ва “Манчестер Юнайтед” клубларининг собиқ ҳимоячиси Жерар Пике ҳужумчилар Лионель Месси ва Криштиану Роналдуни ўзаро солиштирди. АS нашрининг хабар беришича, испаниялик собиқ футболчи Лионель Мессини дунёнинг энг яхши футболчиси деб ҳисоблайди.
“Мен учун Месси — дунёда тенгсиз. Бундай иқтидор эгасини ҳеч қачон учратмаганман. Шу билан бирга, Криштиану ҳар куни тинимсиз меҳнат қиладиган профессионал футболчи эди. Унинг ишга бўлган муносабати ва тайёргарлик жараёни жуда ҳам ҳайратланарли; у ҳар доим энг яхшиси бўлишга интиларди. Бироқ соф иқтидор борасида Месси ундан устунроқ”, дейди Пике.
Собиқ ҳимоячи Мессини биринчи, Роналдуни эса унга жуда яқин бўлган иккинчи ўринга қўйишини маълум қилди. Унинг қайд этишича, ҳар икки футболчи тарихда ўзига хос ўринга эга ва унга кўплаб совринларни ютишда ёрдам берган. Пике Роналдунинг ҳар қандай вазифани уддалай олишини, Мессининг ўйини эса туғма истеъдодга асосланганини алоҳида таъкидлаб ўтди.
Маълумот учун, Жерар Пике Роналду билан ҳам, Месси билан ҳам бир жамоада тўп суриш имкониятига эга бўлган кам сонли футболчилардан бири ҳисобланади. У “Манчестер Юнайтед”да Роналду билан ўйнаган бўлса, “Барселона”да Месси билан тўп сурган.
