Гвардиола: «Биз барибирам зўрмизда!..»
«Манчестер Сити» бош мураббийи Sky Sports эфирида «Бёрнли» устидан қозонилган минимал ғалаба ҳақида тўхталиб ўтди. Бу ғалаба жамоага турнир жадвалида пешқадамликни қўлга киритиш имконини берди. Пеп тиғиз тақвим футболчиларнинг жисмоний ҳолатига таъсир қилаётганини, бироқ натижа биринчи ўринда эканлигини таъкидлади.
— Бизда имкониятлар бўлди, жуда кўп вазиятлар яратдик. Жамоа уч кун олдинги чарчатувчи ўйиндан кейин қўлидан келган барча ишни қилди. Бу осон бўлмади, юкламалар жуда катта. Бир нечта қулай имкониятлардан фойдалана олмаган бўлсак-да, яхши ўйин ўтказдик.
Иккинчи бўлимда менда ҳеч қандай ҳафсала пир бўлиши кузатилгани йўқ, нега шундай бўлиши керак? Биз уч очко олдик ва лигада биринчи ўринга чиқдик. Албатта, бунданда яхшироқ ўйнашимиз мумкин, лекин йигитлар бор кучлари билан ҳаракат қилишди.
«Арсенал»га қарши ўйиндагидан ёмонроқ ўйнадик деган фикрга қўшилмайман. Агар яратилган вазиятлар сонига қараб хулоса қиладиган бўлсак, бугун якшанба кунгидан ҳам яхшироқ кўриндик. «Арсенал» ҳаддан ташқари кучли, аммо ўша ўйиндаги иштирокимиз ҳам ҳақиқатан ҳам сифатли бўлган эди.
Олдинда бешта ўйин бор, бу — Премьер-лига. Бешта ўйин, шанба куни эса бизни ярим финал кутмоқда. Шундан сўнг кейинги турларга тайёргарлик кўрамиз. Бу кетма-кет тўртта финалда ўйнаш учун ажойиб имконият. Балки, биз ротацияга қўл уришимизга тўғри келар. Ўйин якунида чарчоқ сезилди, лекин биз тайёрмиз.
Родрининг қайтишига келсак, ҳозирча аниқ муддатларни билмайман. Биз унинг ҳолатини кунма-кун кузатиб боряпмиз, — дея хулоса қилди Гвардиола.
