“Олинган ҳақ ҳам татимайди”
Анвар Собиров “Хуш келибсиз” кўрсатувининг навбатдаги меҳмони сифатида иштирок этиб, сўнгги пайтларда нега тўйларга камроқ чиқаётгани ҳақида очиқчасига фикр билдирди.
Санъаткорнинг айтишича, у тўйларга боришни деярли йиғиштирган ва аввалгидек фаол қатнашмаяпти.
“Мен аслида тўйларга боришни деярли йиғиштирганман. Тўлиқ эмас, албатта, лекин анча камайтирганман”, — деди хонанда.
Суҳбат давомида бошловчи бу қарор сабабини сўраганида, хонанда чарчоқни асосий омил сифатида кўрсатди. Аммо бу одамлар ёки муносабатлар билан боғлиқ эмаслигини таъкидлади.
Анвар Собировнинг сўзларига кўра, бугунги кунда тўйларда қўшиқдан кўра шоу ва рақсбоп чиқишларга талаб юқори. Унинг репертуари эса ҳар доим ҳам бундай муҳитга мос келавермайди.
“Кўпчилик қўшиқни тингламайди — уларга кўпроқ шоу керак. Мен эса шоу кўрсатадиган хонанда эмасман, мен қўшиқ айтаман”, — деди у.
Хонанда шунингдек, тўйда қўшиқларига одамлар рақсга тушмаса, кайфияти тушиб кетиши ва олинган ҳақ ҳам татимаслигини айтди.
Унинг бу самимий эътирофлари ижтимоий тармоқларда мухлислар ўртасида қизғин муҳокамаларга сабаб бўлмоқда. Айримлар санъаткорнинг ҳаққоний фикрларини қўллаб-қувватламоқда, бошқалар эса бугунги тўй форматлари ҳақида баҳс юритмоқда.
