Эроннинг янги режаси бор. Трамп нима дейди?
Покистонлик воситачилар яқин кунларда Теҳрондан тинчлик таклифининг янгиланган вариантини олишни кутишмоқда. Бу ҳақда воситачилик жараёнига яқин манбалар CNN телеканалига маълум қилган.
Ўтган дам олиш кунлари тақдим этилган режанинг аввалги версиясида биринчи навбатда урушни тўхтатиш кўзда тутилган, Эрон ядро дастури билан боғлиқ масалаларни ҳал қилиш эса кейинроққа қолдирилган эди. АҚШ Президенти Дональд Трамп ушбу вариант уни қониқтирмаслигини очиқ билдирди.
CNN манбаларининг хабар беришича, Эрон ташқи ишлар вазири Аббос Аракчи Россияга ташрифидан сўнг бугун Теҳронга қайтиши керак ва у Эрон раҳбарияти билан маслаҳатлашувлар ўтказиши кутилмоқда. Манбаларнинг айтишича, алоқа жараёни секин кечмоқда, бунга олий раҳнамо Мужтабо Хоманаий билан боғланишдаги қийинчиликлар сабаб бўлмоқда — унинг қаерда эканлиги сир сақланмоқда.
Трамп аввалроқ Эрон томонидан дам олиш кунлари тақдим этилган режани қабул қилмаслигини ишора қилган эди. Манбалар жараён давом этаётганини ва ривожланиш босқичида эканлигини таъкидлашмоқда; кўп нарса Эроннинг АҚШ учун мақбулроқ таклиф тақдим этишига боғлиқ бўлади.
