Маликаларни болта билан чопиб ташлайман!
Нидерландияда малика Амалия ва Алексияга суиқасд уюштиришда гумонланувчи шахс қўлга олинди
Нидерландияда валиаҳд малика Амалия ва унинг синглиси малика Алексияга нисбатан суиқасд тайёрлаганликда гумон қилинаётган 33 ёшли эркак ҳибсга олинди. Бу ҳақда 30 апрель куни Algemeen Dagblad газетаси хабар берди.
«Прокуратура 33 ёшли эркакни 2026 йилнинг февраль ойида Гаага шаҳрида маликалар Амалия ва Алексияга ҳужум қилишга тайёргарлик кўрганликда гумон қилмоқда. Қўлга олинган шахс келаси душанба куни суд олдида жавоб беради», — дейилади материалда.
Полиция маълумотларига кўра, қўлга олиш вақтида эркакнинг ёнидан иккита болта топилган бўлиб, уларга маликаларнинг исмлари ва нацистча шиорлар ўйиб ёзилган эди. Бундан ташқари, унда «Amalia», «Alexia» ва «Bloedbad» (қирғинбарот) сўзлари ёзилган қайд дафтари ҳам бўлган.
Прокуратуранинг фикрича, ушбу буюмлар ва ёзувлар Нидерландия қироллик оиласи ворисларига ҳужум қилишга тайёргарлик кўрилганидан далолат беради.
Эслатиб ўтамиз, аввалроқ, 12 март куни Нидерландияда бир киши ўз онасини болта билан чопиб ўлдирган ва воқеа жойидан онасининг машинасида қочиб кетган эди. Полицияга у қотилликни «малика Беатрикснинг кўрсатмаси» билан амалга оширганини айтган.
