Оббо! Энди буларни нима жин урди?!
Германия БАА ва Саудия Арабистони ўртасидаги низо хавфидан огоҳлантирди
БААнинг ОПЕКдан чиқиши ва ташқи сиёсатдаги ихтилофлар икки давлат ўртасидаги кескинликка сабаб бўлди.
Германиянинг Junge Welt газетаси 30 апрель куни Яқин Шарқда янги қуролли тўқнашув хавфи борлигидан огоҳлантирди. Бу гал гап Бирлашган Араб Амирликлари ва Саудия Арабистони ҳақида бормоқда.
Газетанинг ҳисоблашича, Арабистон ярим оролида кескинлик кучайишига БААнинг ОПЕКдан чиқиши сабаб бўлади. Бу қарор Абу-Даби ва Ар-Риёд ўртасида нефть қазиб олиш ва экспорт қилиш бўйича чуқур келишмовчиликларни келтириб чиқаради.
«Шундай қилиб, бугун минтақа устида янги низо хавфи пайдо бўлди», — деб ёзади Junge Welt.
БАА нефть сотиш ҳажмини сезиларли даражада оширишни истайди ва ОПЕК квоталарини, айниқса, ташкилотда Саудия Арабистони етакчилик қилаётган бир пайтда, ўзи учун жуда чекланган деб ҳисоблайди.
Ташқи сиёсатдаги фарқлар ҳам кескинликнинг қўшимча омилига айланди: БАА Исроил ва АҚШ билан шерикликни фаол ривожлантирмоқда, Саудия Арабистони эса Эрон билан муносабатларда мувозанатни сақлашга интилмоқда.
БААнинг ташкилотдан чиқиши ҳақида 28 апрель куни мамлакатнинг «WAM» давлат ахборот агентлиги хабар берди. Бу маълумотни мамлакат Энергетика ва инфратузилма вазири Суҳайл ал-Мазруи тасдиқлади.
Россия президенти матбуот котиби Дмитрий Песков 29 апрель куни Россия БААнинг ОПЕК ва ОПЕК+ дан чиқиш қарорини ҳурмат қилишини билдирди. Москва келажакда Амирликлар билан маҳсулдор, конструктив ва самарали алоқаларга умид қилишини таъкидлади.
