🛑 ТАСАВВУР ҚИЛИНГ: Ҳамма сиздан воз кечган кун… Сизни ким қутқаради?

Бугунги мақоламиз дунёдаги энг катта бойлик, энг буюк муҳаббат — Муҳаммад соллаллоҳу алайҳи вассаламнинг умматларига бўлган беқиёс меҳри ҳақида. Бу сатрларни ўқир экансиз, кўз ёшларингизни тия олмаслигингиз мумкин.

🌑 Қиёмат: Ота болага, бола отага бегона кун!

Тасаввур қилинг: Қуёш бир чиқаноқ масофада, нафси-нафси азоби ҳаммани қамраб олган. Сиз энг яқин инсонларингизга югурасиз:

Отангизга: «Отажон, озгина ёрдам беринг!» дейсиз.
Фарзандингизга: «Болам, сени оқ ювиб, оқ тараб ўстиргандим-ку!» деб ялинасиз.
Жуфтингизга: «Бир ёстиққа бош қўйгандик-ку…» дейсиз.

Аммо жавоб битта бўлади: «Эй инсон, бугун ҳар ким ўз юкини ўзи кўтарадиган кун! Мен сенга ёрдам беролмайман!»

Даҳшат ичида, оёқларингиз қалтираб, жаҳаннам томон кетаётган бир пайтингизда… тўсатдан бир овоз дунёни титратади!

🔥 Жаннат остонасидаги буюк «Иштибоҳ»

Ибн Аббос ривоят қилади: Қиёмат куни ҳамма Пайғамбарлар учун олтиндан минбарлар қурилади. Барча Пайғамбарлар ўз минбарларига ўтирадилар. Фақат битта Зот ўтирмайди!

У Зот — Муҳаммад Мустафо соллаллоҳу алайҳи вассалам! У Зот Раббимиз ҳузурида тик турадилар. Жаннатга кириш имкони бўла туриб, кирмайдилар! Нега?!

«Ё Раббий, агар мен жаннатга кирсам, орқамда умматим қолиб кетади-ку! Умматимсиз менга жаннат керак эмас!» — деб фиғон чекадилар.

💎 «Ё Муҳаммад, умматинг учун нима қилишимни хоҳлайсан?»

Аллоҳ таоло Ўз Ҳабибига юзланади. Пайғамбаримизнинг (с.а.в) жавобларини қаранг: — «Раббим, уларнинг ҳисобини тезроқ қил, мен уларни шафоат этай!»

Сизни, бизни, гуноҳкор бўлса-да, «Умматим» деб тан олган ҳар бир инсонни жаҳаннам оловидан тортиб оладилар. Ҳатто дўзах посбони Молик ҳайратда қолиб дейди: «Эй Муҳаммад, Раббингнинг ғазабидан қўрққан жаҳаннам Сизнинг умматингиздан бирор кишини ўзида олиб қолмади!»

🎯 Бугунги кун хулосаси:

Бизни ота-онамиздан ҳам кўпроқ яхши кўрган, ҳатто маҳшаргоҳда биз учун тик туриб йиғлайдиган Расулуллоҳга (с.а.в) муносибмизми? У Зот бизни соғинганлар, биз-чи?

Келинг, ҳозирнинг ўзида ушбу мақолани ўқиб бўлгач, у Зотга камида 10 марта саловот айтайлик. Шояд, ўша оғир кунда биз ҳам «Умматим!» деган нидонинг ичида бўлсак…