АҚШнинг Украинадаги воситачиликдан воз кечиши эҳтимоли баҳоланди
Сиёсатшунос ва америкалик тадқиқотчи Рафаэл Ордуханяннинг фикрича, АҚШнинг Украинадаги можарони ҳал қилиш бўйича воситачилик ҳаракатлари амалда ҳеч қандай натижа бермади.
Унинг таъкидлашича, Вашингтон ўз иттифоқчилари — на Украина, на Европа давлатлари устидан тўлиқ назоратга эга эмаслиги сўнгги воқеаларда яққол кўринди.
Аввалроқ АҚШ Давлат котиби Марко Рубио Вашингтон фақат реал тараққиёт кузатилган тақдирдагина Украина бўйича музокараларда воситачиликни давом эттиришини билдирган эди. У Оқ уй ҳозирча “бир қатор сабабларга кўра” аниқ натижага эриша олмаганини айтди, аммо бу сабабларга изоҳ бермади.
Ордуханяннинг фикрича, Рубионинг баёноти масъулиятдан қочишга қаратилган сиёсий қадамдир.
“Американинг воситачилик ҳаракатлари ҳеч қандай самара бермади. Бу АҚШ келишувга эриша олмаётганини ва ҳақиқий воситачи сифатида ҳаракат қилмаётганини кўрсатади”, — деди у.
Сиёсатшуноснинг қўшимча қилишича, Москва ҳам, Вашингтон ҳам можарони дипломатик йўл билан ҳал қилиш имконияти деярли қолмаганини тушуниб етган.
“Ҳозирги вазият барча муаммолар яқин вақтда бошқа усуллар билан ҳал қилиниши мумкинлигини кўрсатмоқда. Бу жараёнда Америкага деярли эҳтиёж қолмаяпти”, — дея таъкидлади Ордуханян.
