Барселона — Реал: кимга байрам, кимга «жаноза»!
Испания Ла Лигасида чемпионлик тақдири «Камп Ноу»даги Эл-Класикода ҳал бўлади дейиш чиройли эшитилади. Аммо бу ҳақиқатнинг фақат ярми. «Барселона» ҳақиқатан ҳам бугун катта чемпионлик байрамини бошлаб бериши мумкин. «Реал» эса, агар мўъжиза юз бериб, Каталония пойтахтида ғалаба қозонса, шунчаки ўз «жанозасини» бир озга кечиктирган бўлади.
Энг муҳими — «Барселона»га ғалаба қозониш шарт эмас, каталонияликларни дуранг натижа ҳам қаноатлантиради. Лекин қизиқ бир жиҳат бор: «кўк-анорранглилар» ўз тарихида ҳеч қачон «Реал»га қарши ўйинда чемпионликни расмийлаштирмаган.
Мутлақо бошқача кайфиятлар
Икки клуб ўртасидаги фарқ ҳозир рамзий маънога эга. «Барселона» хотиржам, ўз кучига ишонади ва «Камп Ноу»да байрамга тайёргарлик кўрмоқда. «Реал» эса сўнгги йиллардаги энг оғир ички инқирозлардан бирига ботган.
«Эспаньол» устидан қозонилган ғалабадан сўнг Мадрид клуби ҳеч бўлмаса рақибининг байрамини бузишни умид қилганди. Бироқ кейинги ҳафта клуб учун ҳақиқий даҳшатга айланди. Испан матбуотида Тчуамени ва Вальверде ўртасидаги можаро ҳақидаги хабарлар жамоа ичида ўта кескин муҳитни юзага келтирди. Мухлисларнинг реакцияси ҳам кескин бўлди. Шу билан бирга, Килиан Мбаппе ҳам танқидлар остида қолди — тармоқларда «Реал»нинг энг яхши тўпурарини сотиб юбориш ҳақидаги талабномага 50 миллиондан ортиқ имзо тўпланди. Ҳозирги инқирозга энг катта «ҳисса» қўшган Винисиус ҳақида-ку гапирмаса ҳам бўлади.
Интизорсиз Эл-Класико
Март ойидаги танаффусдан сўнг Флик жамоаси чемпионлик пойгасида «Реал»ни шунчаки супуриб ташлади. Бир пайтлар мадридликларнинг 4 очколик устунлиги 11 очколик ортда қолишга айланди. Ҳозир «Қироллик клуби» мавсумни совринсиз якунлашига ҳеч кимда шубҳа қолмади.
Шу билан бирга, «Барселона» аллақачон келажак ҳақида ўйламоқда. Флик билан шартномани узайтириш вақт масаласи, клуб эса бор эътиборини келгуси Чемпионлар Лигаси учун таркибни кучайтиришга қаратган.
«Камп Ноу» чемпионлик оқшомини кутмоқда
Каталония бош аренасининг реконструкцияси сабабли, «Реал» охирги марта «Камп Ноу»да уч йил олдин ўйнаган эди. Ўшанда Карло Анчелотти жамоаси каталонияликларни 4:0 ҳисобида мағлуб этганди. Аммо ўшандан бери кўп нарса ўзгарди.
Флик ёш ва беқарор «Барселона»ни ёрқин услуб ва аниқ ўйин идентитетига эга жамоага айлантирди. Нафақат Педри, Гави ва Кубарси каби ёшлар, балки Роберт Левандовски, Рафинья ва Жюль Кунде каби тажрибали етакчилар ҳам янги даражага чиқишди.
«Реал» эса бу вақт ичида Тони Кроос, Карим Бензема ва Лука Модрични йўқотди, лекин ўз даврининг асосий фигуралари ўрнини тўлақонли боса олмади. Ҳатто Килиан Мбаппенинг келиши ҳам муаммони ҳал қилмади, аксинча, кийиниш хонасидаги мувозанатни ва клубнинг маош тизимини бузиб юборди.
Эски урушлар
Майдондаги ўзгаришларга қарамай, клублар ўртасидаги муносабатлар ўта кескинлигича қолмоқда. «Негрейра иши» давом этмоқда — «Барселона» ҳамон ҳакамлар корпусининг собиқ мулозимига тўланган тўловлар бўйича ноқулай саволларга жавоб бермоқда.
Бундан ташқари, Жоан Лапорта ва Флорентино Перес ўртасидаги низо Суперлига воқеаси ва «Реал»нинг «Негрейра иши»да айбловчи томон сифатида иштирок этишидан кейин янада кучайди. Айтиш жоизки, «Қироллик клуби» президенти аввалгидек Барселонага ташриф буюрмайди.
Эл-Класико турнир вазияти ва рақибларнинг руҳий ҳолати жиҳатидан ҳеч қачон бунчалик бир томонлама кўринмаган эди. «Барселона» учун бу зафарли тун бўлиши мумкин. «Реал» учун эса — бутун бир даврнинг якуни рамзи.
