Сақичлардан яратилган ғаройиб девор сайёҳларни ҳайратга солмоқда
АҚШнинг Сиетл шаҳрида жойлашган машҳур “Сақич девори” дунёдаги энг ноодатий ва қизиқарли жойлардан бири ҳисобланади. Бир қарашда оддий кўринган бу девор аслида минглаб одамлар томонидан яратилган ўзига хос “санъат асари”дир.
Бу масканнинг ўзига хослиги шундаки, ташриф буюрувчилар чайнаган сақичларини деворга ёпиштириб кетишади. Йиллар давомида тўпланган ранг-баранг сақичлар деворни ғайриоддий кўринишга келтириб, уни сайёҳлар учун диққатга сазовор жойга айлантирган.
Қизиқ томони, бу анъана 1990 йилларда театр олдида навбат кутаётган томошабинлар томонидан бошланган. Зериккан одамлар сақичларини деворга ёпиштира бошлаган ва вақт ўтиши билан бу оддий ҳаракат ўзига хос урфга айланган.
Маҳаллий ҳокимият деворни бир неча бор тозалашга уринган. Ҳатто бир сафар тонналаб сақич олиб ташланган. Аммо орадан кўп ўтмай, девор яна аввалги ҳолатига қайтган — одамлар уни яна “безашда” давом этган.
Бугунги кунда “Сақич девори” нафақат ноодатий санъат намунаси, балки сайёҳлар учун машҳур фото-маскан ҳамдир. Бу жой кўпчиликни ҳайратга солади: кимдир уни ижод намунаси деса, бошқалар эса ғалати одат сифатида баҳолайди.
