“Отам менга бегонадек эди” — Дилсўз ҳаётидан таъсирли ҳикоялар
Асл исми Гўзал Жуманиёзова бўлган хонанда Дилсўз 8 май куни 37 ёшни қарши олди. Болалигида отасидан айро ўсган, саҳнада қўшиқ айтаётганида ўгай синглиси борлигини билган ва чақалоқлигидаёқ келажакда кимга турмушга чиқиши ният қилинган хонанданинг ҳаёт йўли турли синов ва қизиқ воқеаларга бой.
Санъатга тасодифан кириб келган қиз
Дилсўз 1989 йил 8 майда Навоий шаҳрида таваллуд топган. У мактаб йилларидаёқ тадбирларда қўшиқ куйлаб, иқтидорини намоён қила бошлаган. Аммо у дастлаб санъаткор эмас, ҳуқуқшунос бўлишни орзу қилган.
Кейинчалик мусиқага қизиқиши кучайиб, педагогика йўналишида таҳсил олади. Танловларда қатнашиб, санъат соҳасига қадам қўяди. Хонанданинг айтишича, у ижодий танловда Лола Йўлдошеванинг “О ҳаёт” қўшиғини ижро этиб, саралашдан ўтган.
Саҳнада туриб ўгай синглиси борлигини билган
Хонанда болалигида ота-онаси ажрашиб кетганини, шу сабаб отаси билан деярли мулоқот қилмаганини айтган. У отаси ҳақида онасини ранжитмаслик учун кўп сўрамаганини эслайди.
Бир куни Навоийда концерт бераётганида унга бир қиз хат узатади. Хатда у қиз Дилсўзнинг ўгай синглиси эканини ёзган бўлади. Кейинчалик улар учрашиб, муносабат ўрнатишган.
Хонанда айтишича, турмуш ўртоғи дастлаб бу муносабатга қарши чиққан ва “машҳур бўлмаганингда излашмасди” деган фикрни билдирган. Аммо Дилсўз синглисининг самимийлигига ишонган.
Отаси билан йиллардан кейинги учрашув
Дилсўзнинг сўзларига кўра, у бир сафар Навоийга борганида синглиси отасининг бетоблигини айтиб, уни уйга чақирган. Хонанда Рамазон ойида отасини кўришга борган ва бу учрашув у учун жуда ҳиссий кечган.
Унинг таъкидлашича, болалигидан меҳр кўрмаган инсон кейинчалик ўз отасига ҳам бегонадек муносабатда бўлиб қоларкан.
“Ёлғизлик ҳисси мени кўп қийнарди”
Хонанда болалигида байрам ва туғилган кунларда фақат онаси билан қолиб кетиш ҳисси унга оғир таъсир қилганини айтган. Шу сабабли у катта ва аҳил оилага ҳавас қилган.
Бугунги кунда Дилсўз онасини ёлғиз қолдирмасликка ҳаракат қилиши, уни Тошкентга олиб келгани ва ҳар куни хабар олиб туришини айтади.
Илк устози — Сардор Раҳимхон
Мактабдан кейин у Навоийдаги маданият ва санъат коллежида, сўнг университетнинг мусиқий таълим йўналишида таҳсил олган. Шу даврда у профессионал ижод билан шуғуллана бошлайди.
Дилсўз санъатга кириб келишида биринчи устози Сардор Раҳимхоннинг ўрни катта эканини таъкидлайди.
Шунингдек, хонанда Озодбек Назарбеков билан куйлаган “Ака-сингил” таронаси орқали янада машҳурликка эришган.
“Зиёдага тақлид қилмайман”
Дилсўз кўпчилик уни Зиёдага тақлид қилишда айблашини айтган. Аммо у бу фикрларни рад этиб, Зиёданинг ижодига ҳавас қилишини, лекин унга тақлид қилмаслигини билдирган.
Туғуруқхонадаёқ ният қилинган муҳаббат
Дилсўз “Манго” гуруҳининг собиқ аъзоси Фаррух Раимов билан турмуш қурган. Қизиғи, улар бир туғуруқхонада 10 кун фарқ билан дунёга келган ва ўша вақтдаёқ оналари қуда бўлишни ният қилишган.
Жуфтлик болаликдан бир-бирини таниб ўсган ва кейинчалик 7 йил севишиб юрган. Бугун улар тўрт нафар фарзандни тарбия қилмоқда.
“Оиламизни сақлаб қолдик”
Хонанда оилада ҳам турли синовлар бўлганини яширмайди. Айрим келишмовчиликлар оммага чиқиб кетганидан кейин кўпчилик улар ажрашади деб ўйлаган.
Дилсўзнинг айтишича, у ўша пайтда турмуш ўртоғидан ранжиган ва уни “бир оз қўрқитмоқчи” бўлган. Аммо кейинчалик бу иши хатолигини тушуниб етган.
Унинг фикрича, ҳар қандай оила сабр ва тушуниш орқали мустаҳкамланади.
“Яхшиям борсан” қўшиғи ярашувга сабаб бўлган
Хонанда “Яхшиям борсан” таронаси турмуш ўртоғига бўлган самимий муҳаббат изҳори сифатида яратилганини айтган. Унинг сўзларига кўра, қўшиқ оиладаги дилхиралик пайтида чиққан ва ярашувга сабаб бўлган.
Рўмол масаласидаги чекловлар ҳақида
Дилсўз ҳозирда давлат тизимида — Ички ишлар ансамблида ишлашини айтган. Шу сабабли ташқи кўриниш, хусусан рўмол ўраш борасида маълум талабларга амал қилишга мажбур эканини билдирган.
Унинг таъкидлашича, телевидениеда ҳам бу борада айрим чекловлар бўлган, аммо у бундай қоидаларни давлат қонунлари сифатида қабул қилишини айтган.
