Чўнтакда смартфон, қўлда планшет: Samsung янги ғоя билан чиқмоқда
Технологиялар оламида яна бир қизиқ тенденция пайдо бўлмоқда. Samsung бу сафар одатий букланадиган смартфонлардан ташқари, экран ёнга сурилиб чиқадиган — rollable ёки slideable дисплей технологияси устида иш олиб бораётгани билан диққат марказига тушди.
Сўнгги патентлар ва инсайдерлик маълумотларига кўра, янги концепцияда экран ўртадан букланмайди. Аксинча, дисплей корпус ичига ўралиб жойлашади ва керак бўлганда ён томонга сурилиб чиқади. Бу эса ҳозирги Fold моделларида учрайдиган кўзга ташланувчи букланиш изини деярли йўқотиши мумкин.
Патент тасвирларида қурилма оддий смартфон кўринишида бўлади, аммо махсус механизм орқали экран кенгайиб, уни кичик планшетга айлантиради. Айрим маълумотларда бу жараён мотор ёрдамида амалга ошиши ҳам қайд этилган.
Мутахассислар фикрича, бундай ечим бир вақтнинг ўзида ҳам компактлик, ҳам катта экран қулайлигини таъминлаши мумкин. Шу билан бирга, Samsung ушбу технологияни келажакда фақат смартфонлар эмас, балки телевизор ва мониторлар учун ҳам қўллаш имкониятини ўрганмоқда.
Бироқ ҳозирча бу фақат патент ва прототип босқичидаги ғоя экани таъкидланмоқда. Компания ҳали расман оммавий ишлаб чиқариш бошланишини эълон қилмаган. Сабаби, бундай қурилмаларда чидамлилик, механизм мураккаблиги ва юқори нарх каби муаммолар ҳали тўлиқ ҳал қилинмаган.
Шунга қарамай, технология ишқибозлари буни смартфон бозоридаги навбатдаги катта қадам сифатида баҳоламоқда. Агар slideable дисплейлар оммалашса, келажакда анъанавий букланадиган телефонлар ўрнини айнан шундай моделлар эгаллаши мумкин.
