Белгияда мактаб микроавтобуси поезд билан тўқнашиб кетди: қурбонлар бор
Белгия шимолидаги Буггенхаут шаҳрида мактаб микроавтобуси поезд билан тўқнашиб кетди. Оқибатда тўрт киши — 12 ва 15 ёшли икки бола ҳамда икки нафар катта ёшли фуқаро ҳалок бўлди.
Федерал полиция маълумотларига кўра, ҳодиса 26 май куни маҳаллий вақт билан соат 08:00 дан кўп ўтмай содир бўлган. Микроавтобусда етти нафар ўғил бола, 49 ёшли ҳайдовчи ва 27 ёшли кузатувчи бўлган. Транспорт воситаси махсус таълим мактабига йўл олаётган бўлган.
Белгия транспорт вазири Жан-Люк Крюкнинг билдиришича, тўқнашув вақтида темирйўл кесишмасидаги шлагбаум ёпиқ бўлган.
Яна беш нафар бола оғир тан жароҳати олиб, шифохонага ётқизилган. Прокуратура вакиллари уларнинг аҳволи оғир, бироқ барқарор эканини маълум қилган.
Терговчиларнинг аниқлашича, микроавтобус темирйўлга параллел кўча бўйлаб ҳаракатланган ва ҳайдовчи ёпиқ шлагбаумга қарамай чапга бурилиб, кесишмага чиқиб кетган. Шу пайт Буггенхаут орқали соатига тахминан 90 километр тезликда ҳаракатланаётган поезд транспорт воситасига урилган.
Кучли зарба оқибатида микроавтобус йўл четига учиб, устунга урилган ва кесишмага яқин жойдаги хусусий уй ҳудудига бориб тушган.
Поезд йўловчиларидан ҳеч ким жароҳатланмаган, бироқ бир кишига кучли руҳий зарба сабаб тиббий ёрдам кўрсатилган.
Дастлабки маълумотларга кўра, кузатув камералари кесишмадаги сигнал тизими соз ҳолатда ишлаганини қайд этган — қизил чироқ ёниб турган ва шлагбаум ёпиқ бўлган. Айрим манбаларда микроавтобус тўқнашувдан олдин шлагбаумга тегиб кетгани айтилмоқда.
Ҳодиса юзасидан тергов бошланган. Поезд машинисти алкогол тести топширган ва унда қоидабузарлик аниқланмаган. Микроавтобус ҳайдовчисига нисбатан ҳам суд-тиббий экспертиза тайинланган.
Белгия қироли Филипп ҳалок бўлганларнинг оилаларига ҳамдардлик билдириб, воқеа жойида ишлаган фавқулодда хизмат ходимларига миннатдорлик изҳор этган.
