«У ҳақиқий афсона ва ёшларга намуна»
Португалия терма жамоаси бош мураббийи Роберто Мартинес 41 ёшли Криштиану Роналду нима учун миллий жамоа учун ҳануз энг муҳим футболчилардан бири бўлиб қолаётганини тушунтирди.
Мураббийнинг сўзларига кўра, афсонавий ҳужумчининг таъсирини фақат статистика орқали баҳолаб бўлмайди.
«Биз гапираётган футболчи — ўйинни ўзгартирган бетакрор футболчи. Унинг футболга садоқати ёшлар учун намуна бўлиб хизмат қилади. Терма жамоада 21 йил, 227 та ўйин — ҳеч ким бундай натижага эришмаган. Бу рақамларнинг барчаси Криштиану Роналдуни ҳақиқий афсонага айлантиради.
Унинг марказий ҳужумчи сифатидаги таъсири жуда катта. Унинг ҳаракатланиши, позиция танлаши, ҳужумларни якунлаши ва шериклари учун бўш ҳудудларни очиш қобилияти жамоа ўйинига катта таъсир кўрсатади», — деди Мартинес The Athletic нашрига берган интервьюсида.
Мураббий шунингдек, Роналду фаолияти якунланганидан кейин уни тўлиқ ўрнини тўлдириш мумкин эмаслигини таъкидлади.
«Криштиануни бирга-бир алмаштириб бўлмайди. Бу имконсиз. Унинг самарадорлигини бир футболчи билан қоплаб бўлмайди. Бизга бошқа ечимлар топиш ва ҳужум услубини ўзгартиришга тўғри келади», — деди у.
Бундан ташқари, Мартинес фожиали тарзда ҳаётдан кўз юмган Диогу Жотани ҳам ёдга олди ва уни «Португалия терма жамоасининг нури» деб атади.
«Диогу — бизнинг нуримиз. У Португалия билан жаҳон чемпионлигини орзу қиларди. Энди бу биз учун қўшимча мотивация. Унинг руҳи жамоамизнинг бир қисми бўлиб қолади», — деди мураббий.
ЖЧ–2026да Португалия терма жамоаси «K» гуруҳида Колумбия, Ўзбекистон ва Конго ДР терма жамоалари билан бирга иштирок этади. Дастлабки учрашув 17 июнь куни Конго ДРга қарши ўтказилади.
