Нефть нархи уч ойлик минимумга тушди
Жаҳон бозорида нефть нархлари АҚШ ва Эрон ўртасидаги келишув ҳақидаги хабарлар ортидан кескин пасайди. Brent маркали нефть нархи 3,8 фоизга арзонлашиб, бир баррель учун 79,99 долларга тушди. Бу март ойи бошидан бери илк бор нархнинг 80 доллардан пастга тушишидир.
West Texas Intermediate (WTI) маркали Америка нефти ҳам 3,9 фоизга арзонлашиб, бир баррели 77,61 долларга етди. Бозор иштирокчилари Ҳурмуз бўғозининг яқин орада қайта очилиши ва хомашё етказиб беришнинг барқарорлашишини кутмоқда.
Аввалроқ АҚШ президенти Дональд Трамп G7 саммитида Франция президенти Эммануэль Макрон билан бирга чиқиш қилиб, Вашингтон ва Теҳрон ўртасида келишувга эришилганини маълум қилган эди.
Трампнинг таъкидлашича, ушбу келишувдан сўнг Яқин Шарқда «улкан ўзгаришлар» юз бериши мумкин. У шунингдек, нефть нархлари тез суръатларда пасаётгани ва фонд бозорларида ўсиш кузатилаётганини қайд этди.
