Президент ХВЖ бошқарувчи директорининг ўринбосарини қабул қилди
29 июнь куни Ўзбекистон Республикаси Президенти Шавкат Мирзиёев Халқаро валюта жамғармаси “Швейцария гуруҳи”нинг навбатдаги йиғилишида иштирок этиш учун мамлакатга келган жамғарма бошқарувчи директорининг ўринбосари Бо Лини қабул қилди. Бу ҳақда Президент матбуот хизмати хабар берди.
Қайд этилишича, учрашув аввалида Бо Ли давлат раҳбарига Халқаро валюта жамғармаси бошқарувчи директори Кристалина Георгиеванинг самимий саломи ва энг эзгу тилакларини етказган.
Глобал молия бозорларининг бугунги ҳолати ва ривожланиш истиқболлари муҳокама қилинган.
Ушбу нуфузли халқаро институт билан амалий ҳамкорликни, энг аввало, ўтган йил сентябрь ойида Нью-Йорк шаҳрида Халқаро валюта жамғармаси раҳбари билан ўтказилган учрашувда эришилган келишувлар доирасида янада мустаҳкамлашнинг асосий жиҳатлари кўриб чиқилган.
Мамлакатда пул-кредит, валюта ва фискал сиёсатни такомиллаштириш каби йўналишларда амалга оширилаётган кенг кўламли ислоҳотларда жамғарма муҳим ўрин тутиши қайд этилган.
Макроиқтисодий сиёсат стратегияси ва рақамли тўловлар тизимини ривожлантириш, капитал ҳаракатини либераллаштириш, миллий статистика методологияси ва давлат даромадларини бошқаришни такомиллаштириш ҳамда эркин валюта айирбошлаш курсини қўллаб-қувватлаш масалаларида экспертлик ва техник кўмакни янада кенгайтириш зарурлиги таъкидланган.
Мамлакат иқтисодий идоралари учун кадрлар тайёрлаш дастурларини ривожлантириш масаласига алоҳида эътибор қаратилган.
