Франция томонидан ушланган «Тагор» танкери эгаси 1 миллион евро жарима тўлайди
Франция томонидан ушланган «Тагор» танкери эгаси байроқсиз сузгани ҳамда ҳукумат органлари буйруқларига бўйсунмагани учун 1 миллион евро миқдорида жаримага тортилди. Бу ҳақда AFP агентлиги Брест прокуратурасига таяниб хабар берди.
Маълум қилинишича, кема эгаси айбини тан олган. Шунинг ортидан танкерга Франция ҳудудий сувларини тарк этишга рухсат берилган. Прокурорнинг айтишича, кема эгаси «имкон қадар тезроқ қонуний давлат байроғини расмийлаштириш» бўйича иш олиб бораётганини маълум қилган.
Эслатиб ўтамиз, 31 май куни Франция денгиз флоти Буюк Британия кўмагида Атлантика океанида Россиянинг эҳтимолий «соя флоти» таркибига кирувчи деб ҳисобланган «Тагор» танкерини ушлаган эди.
Франция маълумотларига кўра, танкер Мурманск портдан йўлга чиққан. Кема капитани — Россия фуқароси — Франция денгиз кучлари буйруқларига бўйсунишдан бош тортган. Шу муносабат билан Франция расмийлари тергов бошлаган. Кейинчалик капитан 3 июнь куни озод қилинган.
