Чехия бош вазири: НАТО саммитида тинчлик эмас, уруш ҳақида кўпроқ гапирилди
Чехия бош вазири Андрей Бабиш Анқарада бўлиб ўтган НАТО саммитидан сўнг альянс раҳбарлари учрашувларида асосий эътибор тинчликка эмас, уруш ва қайта қуролланиш масалаларига қаратилганини билдирди.
«Ҳамма уруш ҳақида, ҳамма қайта қуролланиш ҳақида гапиряпти. Аммо кеча мен бир марта ҳам “тинчлик” деган сўзни эшитмадим», — деди Бабиш.
Унинг айтишича, Чехия жорий йилда НАТОнинг мудофаа харажатларини ЯИМнинг 2 фоизига етказиш мақсадига эриша олмаслиги мумкин. Бош вазир буни янги ҳукумат қабул қилиб олган катта бюджет тақчиллиги билан изоҳлади.
Бабиш, шунингдек, НАТО раҳбарларининг норасмий кечки йиғинида мудофаа харажатлари деярли муҳокама қилинмаганини айтди.
«Биз озиқ-овқат, футбол ва бошқа мавзулар ҳақида суҳбатлашдик», — деди у.
Бош вазирнинг сўзларига кўра, учрашув иштирокчилари АҚШ президенти Дональд Трампдан биринчи хоним Мелания Трампнинг саммитда иштирок этмагани ҳақида ҳам сўрашган. Трамп эса узоқ сафар унинг турмуш ўртоғи учун чарчатувчи бўлишини айтган.
