Макроннинг Сурияга ташрифи вақтида портлаш уюштирганлар ушланди
Сурия хавфсизлик кучлари Дамашқда Франция президенти Эммануэл Макроннинг ташрифи вақтида содир бўлган портлашлар ва сўнгги кунлардаги бошқа ҳужумларга алоқадор гумонланувчиларни қўлга олди.
Маълумотларга кўра, хавфсизлик кучлари Дамашқ ва унинг атрофидаги ҳудудларда махсус рейдлар ўтказиб, портлашларни содир этган гуруҳ аъзоларини қўлга олишга муваффақ бўлган.
Дамашқ вилояти қишлоқ ҳудудлари Ички хавфсизлик кучлари қўмондони Аҳмад ал-Далатининг айтишича, гумондорлар ИШИД террорчилик гуруҳи билан алоқадор бўлган. Унга кўра, тергов давомида кузатув камераларидаги тасвирлар ўрганилиб, аввал гумондорлардан бири аниқланган. Сўнгра унинг ортидан кузатув олиб борилиб, гуруҳнинг қолган аъзолари ҳам фош этилган.
Сурия расмийлари портлашлар ортида айнан ИШИД турганини билдирган бўлса-да, террорчи гуруҳ ҳозирча ҳужумлар учун жавобгарликни ўз зиммасига олмаган.
Эслатиб ўтамиз, 7 июл куни Франция президенти Эммануэл Макроннинг Сурияга ташрифи вақтида Дамашқда ахлат қутиси ва автомобилга жойлаштирилган портловчи қурилмалар портлаган эди. Ҳодиса вақтида Макрон президент саройида бўлгани сабаб унга зарар етмаган ва у Аҳмад аш-Шара билан режалаштирилган учрашувни давом эттирганди. Портдаш оқибатда бир киши ҳалок бўлган, 36 киши жароҳат олган.
