Трамп янги импорт божлари ҳақида эълон қилади
АҚШ президенти Дональд Трамп маъмурияти 24 июль куни импорт товарларига нисбатан янги божлар пакетини эълон қилади. Бу ҳақда Оқ уй матбуот котиби Кэролайн Ливитт маълум қилди.
Унинг сўзларига кўра, янги тарифлар тафсилотларини кун давомида АҚШ савдо вакили Жеймисон Грир тақдим этади.
Ҳафта бошида Трамп Канаданинг аксарият товарларига 50 фоизлик импорт божларини жорий этган эди. У Оттавани Америка автомобиллари, алкоголь ва сут маҳсулотларига нисбатан адолатсиз чекловлар қўллашда айблаган. Энергия ташувчилар, калийли ўғитлар, балиқ ва стратегик аҳамиятга эга минераллар ушбу божлардан мустасно қилинган.
Февраль ойида АҚШ Олий суди Дональд Трампнинг фавқулодда иқтисодий ҳолат эълон қилиш орқали кенг кўламли импорт божларини жорий этиш ваколатини чеклаганидан сўнг, маъмурият 1974 йилги Савдо тўғрисидаги қонуннинг 122-моддаси асосида 10 фоизлик глобал тариф жорий қилган эди. Ушбу тарифлар 25 июль куни ўз кучини йўқотади.
Март ойида АҚШ савдо вакили Жеймисон Грир мазкур қонуннинг 301-моддаси доирасида бир қатор текширувларни бошлаган. Ана шу текширувлар натижасида жорий этиладиган янги тарифлар амалдаги божлар ўрнини эгаллаши мумкин.
301-модда доирасидаги текширувлар, асосан, ортиқча саноат қувватларига эга бўлган ва АҚШ фикрича, Америка маҳсулотлари учун ноқулай рақобат муҳитини яратаётган давлатлар, шунингдек, мажбурий меҳнатдан фойдаланиб ишлаб чиқарилган маҳсулотлар импортини етарлича назорат қилмаётган савдо ҳамкорларига нисбатан олиб борилмоқда.
