Роналду ва Жоржинанинг тўй санаси маълум бўлди
Беш карра “Олтин тўп” соҳиби Криштиану Роналду ва унинг қайлиғи Жоржина Родригес футболчининг туғилиб ўсган жойи — Мадейра оролида турмуш қуради. Бу ҳақда Британиянинг The Sun нашри хабар бермоқда.
Манбага кўра, 41 ёшли португалиялик ҳужумчи ва 32 ёшли моделнинг тўй маросими 8 август кунига белгиланган. Жуфтлик диний маросим учун орол пойтахти Фуншал шаҳридаги черковни банд қилган. Асосий зиёфат эса беш юлдузли Савой Palace меҳмонхонасида бўлиб ўтиши кутилмоқда.
Gossip Magazine нашрининг ёзишича, ушбу тадбирга яккакураш олами юлдузлари — россиялик Ҳабиб Нурмагомедов ва ирландиялик Конор Макгрегор таклиф этилган. Шунингдек, кутилаётган меҳмонлар рўйхатидан Рио Фердинанд, Винисиус, Килиан Мбаппе, Родриго каби таниқли футболчилар, актёр Вин Дизель, телебошловчи Пирс Морган, хонандалар Рианна, Женнифер Лопес, Дрейк, Тревис Скотт ҳамда машҳур блогер IShowSpeed ой олган.ж
Эслатиб ўтамиз, Роналду ва Жоржина 2016-йилдан буён бирга яшаб келади. Улар беш нафар фарзандни (Криштиану-кичик, суррогат онадан туғилган эгизаклар Ева ва Матео ҳамда умумий қизлари Алана Мартина ва Белла Эсмералдани) тарбияламоқда. Жуфтлик 2025-йилнинг август ойида расман унаштирилган эди.
Футбол тарихидаги энг яхши тўпурарлардан бири бўлган Роналду 2023-йилдан буён Саудия Арабистонининг “Ан-Насср” клуби шарафини ҳимоя қилиб келмоқда. Фаолиятининг катта қисмини “Реал Мадрид”да ўтказган ҳужумчи клуб билан тўрт марта Чемпионлар Лигасида ғолиб чиққан. Шунингдек, у “Спортинг”, “Ювентус” ва “Манчестер Юнайтед” клубларида ҳам тўп сурган.
Яқиндагина якунига етган ЖЧ-2026 турнирида португалиялик юлдуз 3 та гол уришга муваффақ бўлди, бироқ унинг жамоаси 1/8 финалда бўлажак чемпион — Испанияга имкониятни бой бериб (0:1), мусобақани тарк этди.
