Трампнинг махсус вакиллари Украина-Россия уруши бўйича музокаралар ўтказиш учун Москвага борди
АҚШ президенти Доналд Трампнинг махсус вакили Стив Уиткофф ва куёви Жаред Кушнер ўтирган самолёт 5 сентябр куни Москванинг “Внуково” аэропортига қўнди. Америкалик музокарачиларни Россия президентининг махсус вакили Кирилл Дмитриев кутиб олди.
Уиткофф ва Кушнер Қўшма Штатларнинг Россия ҳамда Украина ўртасидаги урушни тугатиш бўйича бош музокарачилари ҳисобланади. Бир кун олдин Трамп уларнинг Москвага урушни тўхтатиш таклифини олиб бораётганини эълон қилганди.
АҚШ делегациясининг Москвага ташрифи ҳақидаги хабарлар фонида Украина президенти Володимир Зеленский уларнинг сафари чоғида Россия ҳаво ҳудудининг нормал ишлашини ваъда қилди. Шунингдек, Зеленский Киевнинг Вашингтон билан музокаралари пайтида Россияни ҳаво зарбаларини тўхтатишга чақирди.
Хабар берилишича, Уиткофф ҳамда Кушнер 5 сентябр куни Москвада Россия президенти Владимир Путин билан музокаралар ўтказади. Эртаси куни америкалик музокарачилар Украина президенти Володимир Зеленский билан учрашиш учун Киевга йўл олади.
Уиткофф ва Кушнер охирги марта Москвага шу йилнинг январ ойида ташриф буюрган эди. Ўшанда улар Россия президенти Владимир Путин билан музокаралар ўтказганди.
