Ичагида 109 пакет кокаин олиб юрган эркак қўлга олинди
Майоркада ичагида 109 пакет кокаин олиб юрган эркак қўлга олинди.
Майорка аэропортида Нигерия фуқароси бўлган 46 ёшли эркак қўлга олинди. У ичагида умумий оғирлиги 1,3 килограмм бўлган 109 та пакет кокаин олиб киришга уринган. Эркак оролга Бельгиянинг Шарлеруа шаҳридаги аэропортдан учиб келган.
Испания полицияси маълум қилишича, Бельгия ҳуқуқ-тартибот идоралари ҳамкасбларини наркотик контрабандасига шубҳа борлиги ҳақида олдиндан огоҳлантирган. Эркак самолёт қўнганидан сўнг қўлга олинган ва рентген текширувига юборилган. Текширув унинг ҳазм тизимида кўп миқдорда шубҳали капсулалар борлигини кўрсатган.
Тиббий назорат остида эркак барча пакетларни аста-секин организмидан чиқарган. Экспертиза пакетлар ичида кокаин борлигини тасдиқлаган.
Терговчилар таъкидлашича, ҳатто битта капсуланинг ёрилиши ҳам ўлимга олиб келиши мумкин бўлган дозадан ортиқ наркотик қабул қилинишига сабаб бўлиши мумкин эди. Суд гумондорни қамоққа олиш ҳақида қарор чиқарди.
