Наманганда 624 млн сўмлик электр ўғрилиги иши бўйича оқлов ҳукми чиқарилди

Наманган вилояти судида Игамбердиев электр ҳисоблагичга ташқи таъсир кўрсатиб, 624 млн 672 минг сўмлик электр энергиясини ўғирлаганликда айбланган иш бўйича оқланди.

Аввалроқ биринчи инстанция суди унга 8 йиллик қамоқ жазосини тайинлаган эди.

Ҳимоя томонининг таъкидлашича, тергов ҳисоблагичга ким, қачон ва қандай аралашганини, шунингдек, Игамбердиевнинг бу ишга дахлдорлигини ишончли далиллар билан исботлай олмаган.

Хусусан Игамбердиев 2024 йил 15 октябрда раҳбарликни топширган, ҳисоблагич эса 2025 йил 4 мартда текширилган.

Ушбу даврда ҳисоблагичга ким ва қачон аралашганини тасдиқловчи техник далил топилмаган. Шунга қарамай, айблов айнан раҳбарликдан кетган санага боғланган.

Натижада 624,6 млн сўмлик электр ўғрилигида айбланган Игамбердиев апелляция судида оқланди.