Сунъий интеллект ёрдамида яратилган Хитой сериали 4 миллиард марта кўрилди
Сунъий интеллект ёрдамида яратилган қисқа метражли сериаллар Хитойда тез суръатлар билан машҳур бўлиб бормоқда. Уларнинг аудиторияси 600 миллион кишидан ошди.
Бу ҳақда Xinhuа ахборот агентлиги хабар берди.
Энг муваффақиятли лойиҳалардан бири — «Сонг сулоласи қуролли кучлари» сериали. Қадимий Хитойга бориб қолган замонавий ҳарбий хизматчилар ҳақидаги ҳикоя 4 миллиарддан кўпроқ кўрилди.
Лойиҳа устида атиги олти кишидан иборат жамоа ишламоқда. Улар аллақачон ҳар бири икки дақиқадан ошмайдиган мингта эпизодни суратга олишган.
Сунъий интеллект ишлаб чиқариш харажатларини сезиларли даражада камайтирди. Соҳа мутахассисларининг фикрига кўра, юқори сифатли сунъий интеллект сериалини суратга олиш анъанавий суратга олишдан тахминан 10 баравар арзон. Бундан ташқари, 100 та қисқа метражли эпизоддан иборат сериални атиги уч кун ичида тайёрлаш мумкин.
2026 йилнинг дастлабки ўн ойида Хитойда 550 мингга яқин қисқа метражли сериаллар чиқарилди. Уларнинг 94 фоиздан ортиғи сунъий интеллект ёрдамида яратилган. Дастлабки беш ой ичида бозор ҳажми 22 миллиард юандан ошди, деб хабар берди Kazinform.
Оммабоплигига қарамай, лойиҳаларнинг аксарияти ҳали ҳам харажатларни оқламаяпти. DataEye таҳлил компаниясининг маълумотларига кўра, сунъий интеллект серияларининг атиги 1,3 фоизи фойда олиш учун зарур бўлган кўриш даражасига етади.
Экспертлар сюжетларнинг монотонлиги, персонаж образларини яратишдаги хатолар ва юқори рақобатни соҳанинг асосий муаммолари деб аташади. Соҳанинг жадал ривожланиши туфайли Хитой расмийлари бундай контент сифати устидан назоратни кучайтирмоқда.
