Қозоғистон собиқ иқтисод вазири хотини ўлаётганида фолбинга қўнғироқ қилган!
Остонада ўз турмуш ўртоғи Салтанат Нукеновани қийноққа солиб ўлдирганликда айбланаётган собиқ иқтисодиёт вазири Қуандиқ Бишимбаев устидан суд жараёни давом этмоқда. Судда маълум бўлишича, собиқ вазир Нукенова ресторанда ҳушсиз ётган пайтда фолбинга олти мартадан ортиқ қўнғироқ қилган ва аёл таниши билан ёзишган.
Унинг телефонида топилган видеода ўша куни кечқурун собиқ амалдор хотинини бошқа эркак билан алоқаси борлиги ҳақида сўроқ қилгани акс этган.
22 апрель куни судья Айжан Қулбаева судланувчининг телефони паролини олишга муваффақ бўлди ва суд жараёнида далилларни текширишни бошлади. Илгари Бишимбаев бир неча бор ўз паролини беришдан бош тортган.
Судья 9 ноябрь куни кечқурун Нукенованинг ўлимидан олдин собиқ амалдор томонидан ёзиб олинган 12 та видеони намойиш қилди. Телефон судьянинг қўлида эди, видеолар тинглов иштирокчиларига кўрсатилмаган – фақат марҳумнинг акаси ва адвокатларига.
Барча видеоларда Бишимбаев ўз хотинини ҳақоратлаб, унга “ахлат” ва “сука” дея мурожаат қилади. “Мен фақат ҳақиқатни хоҳлайман. Раимбек Баталов билан жинсий алоқа қилдингми? У билан ухладингми?” Видеолардан бирида Бишимбаев: “Мен у билан ухладим, деб айт”, дейди.
Собиқ амалдор дастлаб ёзувларнинг келиб чиқишини “эсламаганини” даъво қилган ва улар унга “Ватсап орқали юборилган” деб тахмин қилган. Кейинчалик Бишимбаев бу видеоларни ўзи суратга олганини тан олган.
У судда Нукенова билан ўртасидаги можароларга аёлнинг “ўтмишдаги муносабатлари” сабаб бўлганини таъкидлади. Унинг сўзларига кўра, аёл унга турмушга чиқишидан олдин Қозоғистондаги таниқли тадбиркор, турмуш қурган эркак билан учрашган.
Маҳаллий ОАВда гап “Атамекен” Миллий тадбиркорлар палатаси бошқаруви раиси Раимбек Баталов ҳақида кетаётганини тахмин қилишяпти. Тадбиркорнинг ўзи Нукенова билан алоқаси борлигини рад этади.
23 апрель куни судья Айжан Қулбаева Бишимбаевнинг телефонини текширишда давом этди. У судланувчининг қўнғироқлар тарихини эълон қилди.
Салтанат Нукенова вафот этган кечаси Бишимбаев телефонида “Гулнар Шим” дея сақланган фолбинга бир неча бор қўнғироқ қилган.
“Байжанов пастга тушаётганида, мен (фолбинга) қўнғироқ қилдим, юрак уришини топа олмаганим учун нима бўлаётганини сўрамоқчи эдим. У жавоб бермади, кейин жавоб берди, тез ёрдам чақиришни айтди ва гўшакни қўйди. Мен унга айтдим: “Сиз у кечқурун уйғонишини айтгандингиз, энди мен уни уйғота олмаяпман, юрак уришини ҳам топа олмаяпман”, деди Бишимбаев судда.
Бундан ташқари, судья собиқ амалдорнинг телефон орқали ёзишмаларини ҳам текширди. Маълумотларга кўра, айбланувчи нафақат фолбинга қўнғироқ қилган, балки унга хат ёзиб, ҳушига келмаётган Нукенованинг аҳволини сўраган.
“Сиз ўз турмуш ўртоғингиз ўзида экани ё эмаслигини билиш учун бир неча минг километр узоқда бўлган одамга ёздингизми? Унинг қандай ҳолатда эканлигини ўзингиз кўрмадингизми? Ва у ёзяпти: “ҳа, ўзида”. Сиз бу ёзишмаларга ишондингизми?” деб аниқлик киритди судья.
“Ҳа, мен бунга ишондим. Мен унга (фолбинга) ишондим”, деди Бишимбаев.
Қўнғироқлар тарихига кўра, Нукенова вафот этган кечада марҳумнинг акаси Айтбек Амангелди собиқ амалдорга қайта-қайта қўнғироқ қилган, аммо улар жавобсиз қолган.
Салтанат Нукенова вафот этган БАУ ресторанига тез ёрдам машинаси ўтган йилнинг 9 ноябрь куни соат 19:55 да тез ёрдам машинаси чақирилган.
Ўша кунги Бишимбаевнинг ёзишмаларини ҳакам ўқиб эшиттирди. Маълум бўлишича, собиқ вазир бундан ярим соат олдин икки аёл билан боғланган.
Биринчи мурожаат блогер Гулнора Носирбековага, иккинчиси эса собиқ вазир уни “Юлия супер” деб ёзиб сақлаб қўйган номаълум қизга бўлган.
Бишимбаев номаълум қиз билан ёзишмаларни ҳали 9 ноябрь куни эрталаб бошлаган. Хотини билан бўлган ҳодисадан кейин соат 19:24 да яна унга: “Нима қиляпсан? Бўшмисан?” деб ёзган.
Соат 19:36 да қиз жавоб берган: “Мен киприкларимни қилдираётгандим. Неччида?”. Бунга Бишимбаевдан жавоб бўлмаган.
Судда собиқ амалдор бу қизнинг кимлиги ва у билан қандай муносабатда эканлигини тушунтиришдан бош тортди.
Тергов маълумотларига кўра, Бишимбаев ўзига тегишли бўлган рестораннинг ВИП кабинасида хотинини бир неча соат давомида уриб, бўғиб ўлдирган.
Нукенова бош мия жароҳати натижасида вафот этган. Текширув натижасида унинг 230 мл қонида мия гематомаси борлиги аниқланди – бу ҳалокатли кўрсаткич ҳисобланади. Экспертиза Нукенованинг ўлими тез ёрдам келишидан 6-8 соат олдин содир бўлган, деган хулосага келди.
Судда марҳуманинг ёрдамчиси Анара Тасова Бишимбаев турмуш ўртоғини геолокация бўйича кузатиб келгани ва унга ишлашни тақиқлаганини айтди. Нукенова ўзининг ёрдамчиси билан учрашувларидан бирига “бинафшаранг” кўкаришлар ва бўғилиш излари билан келган. Бошқа суҳбатда аёл эри уни қаттиқ босим остидан ушлаётганини тан олган, “ўлдиришидан” қўрқишини айтган.
Нукенованинг акаси Айтбек Амангелди судда калтакланган синглисининг суратларини кўрсатди. У суратларни ўтган йилнинг март ойида синглисидан олганини айтди.
“У фотосуратларни юборганида, “Уларни сақлаб қўй” деди. […] У менга Қуандиқ устидан ҳужум қилгани учун полицияга ариза ёзмоқчи эканлигини айтди”, деди Амангелди.
