ВАТАН ҚАДРИ

Бу юрт жаннат, кўзга суртгин тупроғини,

Бу юрт онанг, қизартирма яноғини,

Бу юрт боланг, авайла кўз қароғини,

Ватани йўқ ватан қадрин билмас, болам.

Бу юрт отанг, дуо билан меҳрин тутган,

Бу юрт синглинг, соғинганда йўлинг кутган,

Бу юрт ёринг, йўғингни ҳам бор деб ўтган,

Ватани йўқ Ватан қадрин билмас, болам.

Ватан дея  жондан кечган боболаринг,

Ватан дея  қонлар ютган момоларинг,

Асрларга етди бугун садоларинг,

Ватани йўқ Ватан қадрин билмас, болам.

Авайлагин оқ сут берган онанг каби,

Авайлагин опичлаган отанг каби,

Ватан дея жон берган боболар ҳаққи,

Ватани йўқ Ватан қадрин билмас, болам.

ҲҲМҚ ва ҲҲК ҳарбий қисм кичик сержанти

Дилноза Сулаймонова