“Ер ютиб юборган” одам топилди
Жанубий Корея пойтахти Сеулда катта чуқурга тушиб кетган эркакнинг жасади олиб чиқилди, деб хабар бермоқда “BBC” нашри.
30 ёшда экани айтилаётган марҳум мотоцикл ҳайдаб кетаётганида йўл тасодифан ўпирилиб кетган. Қутқарувчилар унинг жасадини воқеа жойидан 50 метр чуқурликда топишган.
Ижтимоий тармоқларда тарқалган видео лавҳаларда автомобиль ҳайдовчиси ҳам жароҳатланганини кўриш мумкин.
Расмийлар ҳалигача ернинг чўкиш сабабларини ошкор қилмади.
Яқинда Сеул шаҳар ҳукуматига тақдим этилган ҳисоботда сўнгги ўн йил ичида шаҳарда 223 та чўкма содир бўлгани кўрсатилган.
Маълумот ўрнида: январь ойида юк машинаси ҳайдовчиси Япониянинг Яшио шаҳридаги чуқурга қулаб, бедарак йўқолган эди.
Ўтган йилнинг август ойида Куала-Лумпур марказидаги йўлда пайдо бўлган жарликда ғойиб бўлган аёлни қидириш бир ҳафтадан сўнг тўхтатилган эди.
Чуқурнинг энг кенг тарқалган сабабларидан бири оҳактош ёки бўр каби жинсларнинг парчаланишидир. Баъзида бу ҳолат аста-секин содир бўлиши мумкин, лекин жараён вақт ўтиши билан катталашади.
