Сунъий интеллект хатоси АҚШнинг Хитой кемасига қарши ҳарбий операция ўтказишига сал қолди

Сунъий интеллект хатоси АҚШнинг Хитой кемасига қарши ҳарбий операция ўтказишига сал қолди — CNN.
АҚШ ҳарбийлари 2026 йил баҳорида Яқин Шарқдаги Хитой кемасини деярли тутиб қолишган. CNN бу ҳақда тўрт нафар манбага таяниб хабар бермоқда. Бунга сунъий интеллект ёрдамида тайёрланган, аммо хато бўлган разведка ҳисоботи сабаб бўлган.

Ҳужжатда кема ядровий қурол дастури учун компонентлар олиб кетаётгани таъкидланган. Қуролланган америкалик ҳарбийлар аллақачон кема бортига чиқишга тайёргарлик кўрган, ҳарбий самолётлар эса ҳавода бўлган.

Операция бошланишидан бироз олдин тажрибалироқ таҳлилчилар маълумотларни қайта текшириб, хулоса хато эканини аниқлашган. Манбаларга кўра, АҚШ Тинч океани махсус операциялар қўмондонлиги ходими очиқ ва махфий разведка маълумотларини таҳлил қилиш учун чат-ботдан фойдаланган. Кейин эса натижаларни стандарт разведка ҳисоботи шаклига келтириш учун яна сунъий интеллектдан фойдаланган.

CNN манбаларидан бирига кўра, ушбу хато «уруш бошланишига сал қолдирган».

Ҳодиса АҚШ Қуролли кучларида сунъий интеллектдан фойдаланиш жадал кенгайиб бораётган бир пайтда содир бўлган. Январь ойида Пентагон барча бўлинмаларда етакчи сунъий интеллект моделларидан фойдаланишни тезлаштиришни назарда тутувчи стратегияни тасдиқлаган.

Шу билан бирга, CNN манбалари сунъий интеллект ёрдамида тайёрланган разведка материалларини текшириш бўйича ягона қоидалар ҳали етарли эмаслигини таъкидламоқда. Суҳбатдошлардан бири эса: «Сунъий интеллект ёмон ғояга тезроқ келиш имконини беради», деган.